He Waka Tauā ka whakaterea ki ngā karakia whakamaumahara i a Passchendaele

Heeni Brown
  • Tāmaki Makaurau
  • Te Whanganui-ā-Tara

He waka Māori ka whakaurua ki ngā whakamaharatanga kotahi rau tau o Passchendaele. Ko tā Tamahou Temara, e ārahi nei i ngā whakaritenga, he mea whakarewa ake te waka Māori nei i ngā tikanga Māori e aro nui mai ai te ao.

He Waka Taua ka tae atu ki ngā karakia whakamaumahara i ngā hōia i tū ki te pakanga o Passchendaele. Ā, hei tā Tamahou Temara, he ara anō tēnei e hīkina anō ai ngā tikanga Māori.

Tā Tamahou Temara, "Ka nekehia taua waka mā te kamupene o Mainfreight nō roto o Aotearoa tērā kamupene, ka mutu, ka mōhio rā ngā tāngata whenua o Belgium ki a tātou ake te Māori e haere ake nei te mahi i ngā mahi e tika ana mō tēnei hui nui."

Tokowaru ngā kaihoe Māori nō Aotearoa ka tere tahi nei i te waka o "Te Hono ki Aotearoa" me Njord Royal Rowing Club nō Leiden, Hōrana.

"Ko ngā kaihoe i tohua ki ngā waka nā, nō ētahi o ngā rohe e whakamahia ana ngā waka tauā i ēnei rangi. Nō reira mō mātou ka tū ki runga i te atāmira nunui o te ao ki te whakamutu i ō tātou nā mātauranga, mōhiotanga, otirā kaupapa Māori, e tāea ai e ao whānui te mātakitaki."

I hoatu a 'Te Hono ki Aotearoa' ki Te Whare Taonga Volkenkunde. 

A, mai i tōnā orokohanga i ngā tau rua mano, kua kaha ake te hono o Aotearoa ki ōnā huanga Tatimana, ā, kua māma ake anō te huarahi kia whakaurua te Māori ki ngā kaupapa maha i Uropi.

"Ko ētahi o ngā kaihoe i tohua he pānga ō rātou ki reira, i haere ake ō rātou nā tīpuna ki te whawhai i te pakanga tuatahi o te ao, ehara ko Passchendaele anake engari ko ngā whenua o roto o Somme, o Awherika, ērā tūmomo wāhi katoa. Koira tētahi āhuatanga e whakaaro nei ngā kaihoe ki te taha wairua, ki te tūhono anō ki ō rātou anō tīpuna e takoto mai ana i roto i te whenua o Belgium." 

Hei āpōpo wehe atu ai te tira waka Māori nei ki Belgium, ā, hei tērā Rāapa ka tū ngā mahi whakamaumahara i te pakanga o Passchendaele, ki Menin Gate.