He wairua kaikiri kei te rere ki waenga i ētahi o ngā kainoho o Takarunga mō tētahi whakakitenga Māori

Wepiha Te Kanawa
  • Tāmaki Makaurau

Rere ana te wairua kaikiri ki tētahi o ngā wāhi whai rawa o Tāmaki Makaurau, arā, i Te Raki Paewhenua, mō tētahi whakaaturanga toi Māori. Huhua ana ngā karere a te marea o Takarunga ki te kai-whakahaere o te whare whakaatu toi o 'Depot Artspace' e tono ana kia whakakorea atu ētahi o ngā mahinga toi, nā te mea hei tā rātou, he 'kaikiri' ērā ki ētahi o te hapori.

Hīkaka katoa ana a Linda Blinkco, te kaiwhakahaere o Depot Artspace i Takarunga, i te whakatūnga o tētahi whakaaturanga Toi Māori ki tana whare toi, hēoi, e rua rā noa whai muri i te whakarewatanga o 'He Whakaputanga mai o Te Rangatiratanga', hēmanawa ana ia i ētahi o ngā kōrero mō ngā mahinga toi.

I toro tonu atu ētahi o te hapori ki te kaunihera o Tāmaki Makaurau kia tangohia atu ngā pou haki nei.

Nō te ata tonu nei ka whakapā atu tētahi nō te kaunihera o Tāmaki ki Depot Artspace me te tono kia tangohia atu ngā pou haki, engari kāore tētahi nō te kaunihera I hiahia ki te korero ā kāmera mai.

Kei te tū tonu ngā pou haki i waho ake i te whare toi i tēnei wā, ā, ka tū tonu ki reira kia taea rā anō te heri atu ki wāhi kē.