Kaupapa: Employment

He tutū puehu hei tuatoko i ngā kaimahi o HOYTS kei aukati rātou i te mahi

Mānia Clarke
  • Tāmaki Makaurau
  • Waikato/Te Waiariki
  • Te Tai Hauāuru
  • Te Tai Rāwhiti
  • Te Whanganui-ā-Tara
  • Te Waipounamu

E tutū ana ngā mema me ngā apataki o te uniana o Unite i te puehu, hei taunaki i ngā kaimahi uniana o HOYTS kei te whakahē i ngā kirimana utu mahi. Kua werohia aua kaimahi arā, ki te porotēhi rātou ka rāhuitia kia kore ai e hoki ki te mahi mō te kotahi marama. 

He au tangi, he pahū ā-motukā, hei taunaki i ngā kaimahi o HOYTS e kore e whakawetiwetihia

“Ko te wero mai i te kamupene ki te whakakore mahi ngā kaimahi ka aukatingia ngā kuaha, nā reira, kua tae ā-ope mai mātou o te uniana me ō mātou hoa, ō mātou hoa mahi ki te whakatūtū, he picket kē tēnei mahi, ehara i te strike, kia noho pai tonu ngā kaimahi ki ō rātou tūranga mahi,".

Kua takatōria te mānuka e Hoyts, whai muri i te whakatau a ngā mema ūniana ki te whakaparahoko i te whakaaetanga utu-mahi e toru tau, kia hoki ai i ngā kaimahi e whiwhi ana i te utu ā-pāpātanga ki te utu-mahi iti iho.

“Ko te mea matua, ka heke iho te putea ki ngā tangata, ngā tangata pūkenga, ngā tangata matatau ki ēnei momo mahi. Nā reira ka heke iho aua putea kia tata ki te utu orange,” i kī atu a Roundill.

Kua toru marama te uniana o Unite rātou ko ngā kaiwhakahaere o HOYTS e whitiwhiti kōrero ana e pā ana ki te utu-mahi engari auare ake.

I tētehi tuhinga nā HOYTS i tuku ki ngā kaimahi katoa e mea ana, ki te tū tētehi o ngā kaimahi ki te porotēhi ka aukatihia rātou ki te mahi.

“Hōhā katoa, kua roa kē mātou e whakawhiti kōrero ana, nā pau noa te wā ka haere mai a HOYTS Australia me ā rātou kōrero, ō rātou whakahē i a mātou kōrero.”

Hei tā HOYTS ki a Te Kaea e whai whakaaro ana rātou ki ngā mōtika a ngā kaimahi ki te porotēhei, wheoi ka whai rātou i ā rātou tukanga whakahaere kia kore ai i ngā kaiutu e pā kino nei.

E whakarite ana a Unite ki te hoki atu ki te tēpū kōrero ai ki a HOYTS ākōkō ake nei.