He tumuaki hōu mā Te Aute

Aroha Treacher
  • Te Tai Rāwhiti

Tata ki te toru tau ki muri, i toko ake ngā mānukanuka, ka whakakapia pea ngā kuaha o te kāreti o Te Aute.

Heoi, he tīmatanga hōu ināianei, i te rāhiritanga o tō rātou tūmuaki hōu, i te whakamanatanga o te poari hōu, i te waitohu hōu anō hoki e whakapoapoa ai i ētahi tauira hōu.

I tēnei raro motuhake i karapotia a Shane e tōna whānau me tōna iwi, ā, ko tōna āwhero nui kia puta tonu i te kura nei ngā rangatira Māori mō āpōpō, he taitama e mau pū ana ki tō rātou Māoritanga me o rātou whakapono.

Kua whakaingoatia he poari whakakapi hōu, tokowha ōna mema, ā, ko te roia, ko Moana Jackson, hei ārahi.  Ka mana te poari nei mō ngā tau e rua, kia ū pai ai te marautanga hōu, kia whakatauria anō ai te waka o Te Aute, tae noa ki te wā ka whakamanahia he poari tūturu.

I te tau rua mano tekau mā tahi, i tata kapi te kura, nā te hekenga o te rārangi tauira ki te waru tekau mā rima noa, kei raro noa atu i te rahinga tauira ka taea.

E toru tau ki muri i whakaingoatia a Elizabeth Ellis e Te Tāhūhū o te Mātauranga hei kaikomihana mō te kura, hei whakatika i te taha ki ngā whakahaere, otira i te rā nei, ka heke ia i taua tūranga.