Kaupapa: Domestic Violence

He tuku poihau hei whakamahara i ngā pārurenga tukino-ā-whānau

  • Tāmaki Makaurau

Ahakoa whitikia ana a Manurewa e te rā, kua tō kē te rā ki ngā pārunga kotahi rau kua pahemo i roto i ngā tau e rua kua hori. 

He tuku poihau te mahi a Te Arai Hou Āta Mahi o Aotearoa, tētahi ratonga kaupare i ngā mahi tūkino ā whānau, kia whakamahara i ngā pārūrenga kua riro ki te ringa o patu. 

Hei tā te Kaiwhakahaere o Te Arai Hou Āta Mahi o Aotearoa a Raewyn Bahna e tohu ana te tokoiti o te hunga i tae atu ki Manurewa Marae, i te nui o ngā mahi e anga atu ai te tangata ki ngā kaupapa whakamōhio i te hapori. 

Ko Te Arai Hou Āta Mahi o Aotearoa, he rōpu e mahi ngātahi ana me ngā tari pirihimana o te tonga o Tāmaki. Hei tā Te Rata Hikairo, he mema o te poari whakahaere o Te Arai Hou, he morehu ia o ngā mahi tūkino a whānau. Hei tāna, ko te rongoa he whakamōhio, he whakaako i te tini ki ngā ahuatanga o te ngangara nei. 

"Ka haere au ki taku kura, ka haere au ki ōku kaiako, ki taku tumuaki me te kōrero atu ki a rātou, ko ēnei ahuatanga kei te au pēhi ki runga i ahau. Nā tērā ka whai mātou i ngā awhina. Nō reira ko te mea nui kia korero", te kii a Hikairo.  

Hei tā te kaiwhakahaere, a Raewyn Bhana, ko te tokoiti o te hunga i tae mai i te rā nei, e tohu ana i te nui o te mahi ki roto i te rohe o te tonga o Tāmaki Makaurau mō ngā mahi kaupare i ngā mahi tukino ā whānau.