Kaupapa: Land

He tū whakahē i te kaupapa SHA62 ki te hui o Fletcher Ltd

  • Tāmaki Makaurau

He tono mō te whakatū whare ki runga i ngā whenua o Ihumātao tā te whakatakoto ake a te kamupene Fletcher Residential Limited ki Te Kāhui Komihana o Te Kaunihera o Tāmaki. He tono e kaha whakahēngia ana e te iwi kāinga o Makaurau Marae, e whakatutū ana i te puehu.

Ahakoa ngā whakapōrearea me ngā hūrō a ngā iwi whakahē, haere tonu te hui mo ngā tono a te Kamupene Waihanga Whare o Fletcher ki mua i te aroaro o te Kāhui Kōmihana a te Kaunihera.

Hei tā Waimarie McFarland o S.O.U.L, "Ki te tuku atu i tō ratou wero ki te kaunihera, kia Fletchers hoki kia whakarongo mai ana ki tō matou tono kia whakakorengia te whakatū ngā momo whare tatangia ki o matou wāhi tapu."

He kaupapa tenei kua roa e taukumekumehia ana, heoi ahakoa pēhea te wherawhera, te wetewete me te tīhaehae i ngā kōrero ka pūmau tonu ngā iwi kāinga ki ta ratou e hiahiatia ana mai rāno.

"Ko tā ratou e kī me āta tūpato matou i ēnei wāhi i ēra wāhi engari ko ta matou kē me waiho te wāhi katoa," te kii a McFarland.

Kihai ngā māngai o te kamupene Hanga Whare o Fletcher i pirangi ki te kōrero mai ā kāmera kia Te Kāea, heoi he pānui ā tuhi nei i tukuna mai.

"Kei te kōrerotahi, kei te mahitahi rātou ki te taha o ngā māngai i tohua e te iwi, 

Kua tono rātou mo tetahi rīpoata whai pānga mai ia Heritage NZ,  

Kua waihangatia he hōtaka hei manāki i ngā wāhi tapu, ngā taonga, aha noa atu ka hauhaketia ake e ngā whakamahinga o tenei kaupapa."

Otira ko te kōrero whakamutunga a te iwi kāinga, he wero, he whakatūpato.