He tono tā Jackson ki mua i te Kōti Teitei mō poari Māori o Tāmaki

Heeni Brown
  • Tāmaki Makaurau

E tono atu ana a Willie Jackson ki te Kōti Teitei ki te kimi whakamārama e mōhio ai, he aha i kore ai tana tohutanga atu ki Te Uepu Tohutohu Māori o te Kaunihera o Tāmaki Makaurau.

Engari, ehara ko rātou anahe kei te kawea e ia ki te kōti.  Kei te haria hoki, ko te Minita Take Māori.

E kōkiri whakamua ana a Te Kani Williams rāua ko Ihipera Peters i ngā nawe a Willie Jackson ki te Kōti Teitei.

Hei tā Williams, e whakapono ana a Jackson i āhua hē te huarahi o te poari ki te whakaae ki tētahi tangata, a Mr Tony Kake, ki runga i te poari.

Ko te tono a Jackson ki te Kōti Teitei kia whai māramatanga, he aha i tohua ai a Tony Kake hei kanohi mātāwaka mō Te Uepu Tohutohu Māori, ehara ko ia.

Ko tā Jackson e tohea ana, horekau kē he reta tautoko i a Kake.

Nā, e iwa ngā reta tautoko i a Jackson me tana aru i te tūranga mātāwaka, arā, nō ngā marae, ngā hahi Moromona me Destiny, ngā Wātene Māori me te Kaunihera ēnā reta.

I kōrero a Te Kāea ki a Tony Kake engari kahore ia i hiahia kōrero mō tēnei take.

Heoi, i kōrero mai a Tame Te Rangi, te heamana o Te Uepu Tohutohu Māori, ā, hei tāna, 'Ka puta ngā kōrero a te rōpū i tohua ki te kaupapa nei a te wā e whakaritea ai e te kōti mō aua kōrero.'

Ko ngā mana whenua o Tāmaki Makaurau te mana kia tohua ai ngā mema mana whenua tokowhitu me ngā mema mātāwaka tokorua nō ngā iwi rāwaho.

He tūranga tautoko hoki tā te Minita Take Māori i te paepae tohutohu me ngā whakahaerenga o te Uepu.

E ono katoa ngā haepapa, ko tētahi pēna ka tutū te raruraru ki waenga i te Paepae Tohutohu me Te Uepu, me uru mai te Minita ki te whakatika.

Āe marika, ko Tākuta Pita Sharples kei te rārangi ingoa kua karangahia.

Hei tā te Minita, kei te noho mū ia nā te mea kei mua i te aroaro o te kōti te take.

Kia mahara hoki, atu i a Tony Kake, ko John Tamihere te tuarua o ngā māngai mātāwaka.

Nā, e tautoko ana a Tamihere i tōna hoamahi (Jackson).

Ki runga iarere reo irirangi i te rā nei, i whākī a Tamihere, "I mua noa atu te tautoko mā Willie Jackson i ērā atu.  He mahi tino hē rawa atu tā te Iwi Electoral College."

Kua whakaritea e te Kōti Teitei o Tāmaki Makaurau kia rongohia anō ai tēnei take a te Rāpare e heke mai nei.