He tono tā Flavell kia haumarutia tētahi huarahi i Awahou

Mere McLean
  • Waikato/Te Waiariki

Kei te tautoko te Minita Whakawhanake i te iwi Māori a Te Ururoa Flavell i ngā karanga a te iwi noho i Awahou, Rotorua, kia whakatikahia tetahi o ngā huarahi matua, whai muri i te nui o ngā aituā kua pā ki taua rori i ngā tau.

Hei tāna, “I te nuinga o te wā, he āhua pai tonu te haere ki tērā rori, ko te mate kē, nā runga i te aituā i pā mai ki taku rahi, ki a Ngāti Rangiwēwehi i ngā rā tata kua hipa ake kua puta te āwangawanga a ētahi.”

E rārangi ana te rori nei i te putiputi, he tohu whakamahara ēnei ki te tokorua i aituā i tēnei wiki.  Ko te iti me te rahi i tangihia, i mihihia ki Tarimano Marae, Awahou i te rā nei.

I kōrero a Te Kāea ki ētahi o ngā whānau e noho ana ki tēnei huarahi, tokoono o rātou i kī mai kua roa rawa rātou e māharahara ana ki te horo rawa o ngā waka ki tēnei rori, me te whakahau kia whakaheke te pae tere mai te kotahi rau ki te whitu tekau.

Kua eke te tokomaha o ngā aitua ki ngā rori o Rotorua i tēnei tau noa iho, ki te whā.  E rere tonu ana te heitara a ngā pirihimana na te aha i pā te aituā, me tā rātou kia āta haere.