Ngā kaupapa: Iwi Settlements, Tūhoronuku

He tono kua whakatakotohia e te rōpū Hokianga Hapū Whānau Collective ki te Taraipiunara

Dean Nathan
  • Te Tai Tokerau

Me ohorere te tirohanga a te Taraipiunara o Waitangi ki te rōpū Tūhoronuku kua tohua e te Kāwanatanga hei mana whakatatū i ngā kereme tiriti o Ngāpuhi.

Koinei te tono kua tukuna e ngā hapū o Hokianga i tēnei wiki.  Whai muri ia Ngati Hine, ko rātou te tuarua o ngā taiwhenua i te whare tapu o Ngāpuhi kia tohu i to rātou hiahia kia kaua e uru ki ngā whakahere o Tūhoronuku.

Whai muri i te hui a te rōpū Tūhoronuku ki Hokianga i te Turei o tēnei wiki, kua taka te tono a ngā hapū o reira kia rongo ohorerengia taua take e te Taraipiunara o Waitangi.

Ko tā te heamana o te Hokianga Hapū Whānau Collective, ko Rudy Taylor, “ka tū kaha a Hokianga i runga i tēnei whakaritenga, ko te hiahia kia heria tēnei take ki te Taraipiunara, na tā mātou kore hiahia ki te noho ki raro i a Tūhorornuku.”

Puta noa i te rohe koinei te take wera o te wā ki ngā ngutu tapetape. Nō tera wiki ka tatū ia Ngati Hine kia puta atu rātou i ngā whakahaere  o Tūhoronuku me te rongo korero a Te Kaea mo te maha o ngā karangatanga hapū e whakahuihui ana ia rātou ano ki te whiriwhiri I te ara hei whai mā rātou.

Neke atu i te toru tau kua pahure iaianei no te nohonga tuatahi o te Taraipiunara ki roto o Ngāpuhi mo Te Whakaputanga me Te Tiriti i kīa ai te korero, kīhai a Ngāpuhi I tuku I tōna mana ki tētahi kē atu ā taka mai ki te ra nei, kei te tatari tonu mo te pūrongo a te Taraipiunara.

Hei tēnei ahiahi timata ai he hui ki Whirinaki e whai wāhi ano ai ngā hapū o Hokianga ki te wānanga i tēnei kaupapa.