He tautohe mō ngā kai-ārahi o te Pāti Māori

  • Te Whanganui-ā-Tara

Mō te mana whakahaere o te Pāti Māori, te hanga nei ka kore pea a Te Ururoa Flavell e tū ki te tūnga o Pita Sharples i ngā rā tata nei. Kua puta te kai-ārahi takirua a Pita me te kī he wā kei reira kia tū a Te Ururoa hei kai-ārahi, heoi ehara tēnei te wā mōna.

Ko te whakapae a Willie Jackson he kaikōrero i ngā take tōrangapū e tohu ana aua kōrero i ngā raru kei te pupū ake i te Pāti Māori. Ko tāna i roto i tētahi uiui reo irirangi ki waenganui i a ia me Turia ko te whakatau i puta i a ia he tohu kia Pita ki te whakawātea i tōna tūranga kai-ārahi i tēnei tau.

E whakatata mai ana te ahurei o Tahu Pōtiki, i Rātana Pā, ki reira tautohea te anga whakamua mo te Pāti Māori. Ko Rātana Pā tonu te ahikāroa a Tariana Turia, ko tā ngā mātanga tōrangapū ki reira a ia e whakatau ko wai ka whakakī i tōna tūranga.

Ko Rāhui Katene rāua ko Kaapua Smith-Purks ētahi o ngā īngoa kua kōrerotia mo taua tūranga, ko te whakahoki a Sharples he nui tōna tautoko mo rāua tahi, he nui anō hoki a rāua pukenga mo ēnei mahi. Ko tā ngā mātanga tōrangapū me whakaritea tētahi e mōhio pū ana ki ngā āhuatanga o te ao tōrangapū.

E whakapāetia ana e kore e roa kā mohio ko wai te wahine kai-ārahi, engari ko te āhua nei ka noho tonu a Pita Sharples hei hoa mārena mo taua tūranga tonu.

Ahakoa e kaha tautokohia ana e Turia ia Flavell, e ai kia Sharples kei i a ia tonu te tautoko a te iwi me ngā kaitautoko o te Pāti Māori. Ko tāna ko te hiahia kia noho tonu ia ki reira tae noa ki te tohu o te iwi ki a ia kia whakawātea i tōna tūranga mahi.

Hei tērā wiki ngā mema paremata ka pōwhiritia e Rātana Pā, hei whakanui i te rā whānau o Tahu Pōtiki Wiremu Rātana.

Kairīpoata: Heeni Brown.