Kaupapa: Arts

He ringa toi Māori rangatahi e ara ake ana i tōna hauā

  • Te Tai Tokerau

He roa te hīkoi a Herepainga Rawiri i a ia e mārama ana ki te korenga o tōna ringa toi i mau i a ia i mua.

Heoi ko ngā uauatanga kua tau ki a ia i ēnei wā, tē whakapōrea tōna aurere me tōna ngana ki te whai i ōna moemoeā

I tērā tau, i aituāhia a Rāwiri i tētahi o āna akoranga ringa rehe i Te Kura Tuarua o Tikipunga, ko ngā moka o ōna ringa matau i tapahia i tāna whakamahinga i tētahi papa kani. Tata ki te ono marama kua hipa mai i te aituā, ā he uaua tonu tāna mahi i ngā mahi o ia rā, o ia rā, mātua rā āna mahi toi.

Hei tā Rāwiri, "tē taea e au te mahi peita kia rite ki te pai o aku mahi i mua, tē taea anō e au te tuhi, ā kāre i te tino pai hoki taku whakatangi rakuraku ināianei."

I mua i tōna aituātanga, i whai wāhi nui te taiohi tekau mā waru tau te pakeke nei nō Otangarei - Whangarei i tētahi pakipūmeka, e whā ngā wāhanga, i paohotia i runga i a Whakaata Māori i te tauihu o tēnei tau.

I roto i te pakipūmeka, i hora i tōna ngākaunui ki ngā mahi hanganga me tōna arohanui ki te mahi toi. He wāhanga o te pakipūmeka i whakaatu i a Rawiri e peita ana i tētahi kōwai nui i te puku o Otangarei hei tohu i ngā wawata me ngā hiahia o te hapori. (Whakaahua ki raro nei)

E maia ana ia, he wā tōna ka ara ake ia i tōna hauā.

"He mate engari e oke tahi ana au, ā kei te āta ako au me pēhea e taea anō e au ēnei mahi, heoi ko te mate nui kua puta i te aituā nei, ko ngā pānga ki aku mahi hanganga, ka tino tūmeke au ina rongo au i te tangi o ngā kani hiko" tā Rāwiri kōrero.

Nōnākuanei, ka huri te aro o Rawiri ki te whai i tētahi mahi kē atu. Ināianei, e noho ana ia me tōna whānau ki Tāmaki, ā kei te ako ia i ngā mahi pōkai whenua me te tāpoi i runga i te tūmanako kia mahi ia hei kai-taurima rererangi.

Ahakoa te whakaoho o Rawiri i te rongo i ngā kani hiko, e tūmanako ana ia, ā tōna wā ka taea tonutia tāna mahi i te ahumahi whakatū whare me te whakamahi anō hoki i te rākau peita.