Kaupapa: Kapa Haka

He rau ngā kaumātua o Taniwharau i eke ki te papa ngahau

Te Kuru o te Marama Dewes
  • Waikato/Te Waiariki

Haruru ana te whare i te takimano kua whakakao atu ki te mātaki i ngā toa haka o Tainui e pakanga ana ki te papa tūwaewae. 

Nō te ahiahi nei tū ake a Te Pou o Mangatāwhiri, i rongo hoki i ngā reo rōreka o Iti Kahurangi, ka mutu he rōpū hou i ara ake arā, ko Ngā Pou o Taniwharau.

Heoi he kaupapa anō i tua atu i te whakataetae mā ngā rōpū hāpai o Taniwharau, he whakanui i tō rātau pou kua ngaro nei i te tau kua pahure atu, arā, i a Tōmariangi Paki.

Neke atu i te kotahi rau ngā kaumātua o Taniwharau i eke ki te papa ngahau.

Hei tā te kaiako o ngā rōpū tautoko a Turongo Paki, “Ka hoki ngā mahara ki a rātau rā e mahingia ana i ēnei mahi me te tautoko te hāpai koina te kaupapa nui,”

Tokotoru ngā rōpū tautoko i tū hei whakakanohi i a Taniwharau.

“Ehara i te māmā, he mea uaua rawa te whakakao i ngā pakekek i ngā kaumātaua he oranga kei roto,” te kī a Paki.

Hei tāna anō he wā tonu hei whakanui i Tomairangi Paki i wehe atu i te ao kikokiko i tērā tau, ko tā Tūrongo Paki he pou ia i kaha tautoko i ngā rōpū o Taniwharau i ngā tau.

“Hei poroporoaki i te ngarohanga o Tomairangi, koia te pou o te rōpū o Taniwharau.”

I waiatatia e rātau ngā waiata ō mua me ētahi waiata hou.

“Ko ngā waiata e waiatahia e āhei ana ki te Kīngitanga te whakanui i te kotahi rau ono tekau tau. Me kī me te whakaako anō i aua waiata kua ngaro koia te tino kaupapa te whakaoraora i ngā waiata o nehe.”

Ka mutu, ko Ngā Pou o Taniwharau tērā i tū ki te whakataetae, ki te aruaru i te ara ki ngā whakataetae ā motu hei tērā tau.