Kaupapa: Koroneihana

He rārangi whakahōnore hōu kua rewaina e te Kīngi Māori

  • Waikato/Te Waiariki

Muia ana te marae o te motu e te tini ngerongero mō te rā whakamutunga o te koroneihana tuawaru a Kīngi Tūheitia, otirā te rā e tuku ai ia i ōna whakaaro mō te tau kua hori me ōna wawata mō ngā rā e tū mai ana.

E rua ngā tino wāhanga i whakapuakitia.

Ko te whakarewatanga o ngā tohu hōnore a te Kīngitinga he kaupapa hōu i puta i a Kīngi Tūheitia i te rangi nei i tōna kauhau ki te motu, ā, e toru ōna taumata, kei roto i ia taumata ōna ake wāhanga.

Heoi ko ngā kaiwhiwhi tuatahi i te hōnore o te taniwha, ko Kara Puketapu rāua ko Koro Wetere.

Hei tā Rāhui Papa, “Ko Kara Puketapu tētahi ahakoa i roto i ngā tekau tau ki muri nei e kaha tonu ia ki te mahi mō te iwi nei, koia tētahi kua tino āwhina i tana iwi i roto i ngā tau.  Ko Koro Wetere, me pēhea hoki rā?  He pāpā ki te Kīngi i te wā i a Korokī i te wā, i a Te Ātairangikaahu, ā, ko Koro tētahi o ngā pou o te pae.”

E ai ki a Hone-Haunui Rapana, “Ko te whakaaro kia hoatu te Kīngi he tohu ki te tangata Māori katahi te whakaaro nui ko tēra na runga i te mea e whakanui ana tātou te Māori mō ngā mahi kei te mahi mātou i te ao hurihuri, nō reira mōku ake kātahi te whakaaro ātaahua ko tēnei.”

I tua atu i tērā, i puta i a Kīngi Tūheitia ōna kare ā-roto mō tōna pānga ki te mate pukupuku me ngā hara a tāna tama, a Korotangi i ngā marama tata.  Ko tāna, he tuku whakapāha ki te marea me te wero anō i te hunga pāpāho kia titiro ki te whānuitanga o ngā kōrero i a matau nei e whakapāho ana i ēnei tū take.

E mea ana a Rāhui Papa,“I kōrerotia i runga i te whakaaro he nui ngā whakawhiu a te hunga pāpāho a Pukamata, a Youtube i tāna tamaiti, me te mea nei ehara tana tamaiti i te anahera!  Heoi ano ko tāna he kī ake te hoki tuarua atu o te kōti ki te wetewete i te kauapapa na runga i te ahua o te pāpāho otirā o te pukamata, nō reira i hiahia aia kia puta ana kōrero ki mua i te aroaro o te iwi.”

Hei whakakōpani ake i te kauwhau a te Kīngi, i tuku mihi hoki ia ki ngā kaitōrangapū Māori e wehe ana i te Whare Pāremata ā tērā marama, pērā i a Pita Sharples rāua ko Tariana Turia, ā, arā hoki āna kupu tautoko i ērā e ū tonu ana i te kōwhiringa nui a tērā marama.