Kaupapa: Entertainment

He rangi motuhake hei whakanui i ngā tamariki noho whakaraerae ki Funfest

updated Wepiha Te Kanawa
  • Tāmaki Makaurau

Ka noho te hui Funfest ki te taiwhanga o Mt Smart hei wāhi tākaro utu kore mā ngā tamariki noho whakaraerae.  Kua tukuna rātou kia tomo moata i raro i tētahi āhuatanga hōu, i mua i te whakatūwheratanga ki te marea āpōpō.

He āhuatanga tēnei tē taea te hoko, me te mea hoki he momo e kore rawa e wareware i ēnei tamariki.

Hei tā te kaiwhakahaere tauhokohoko, tā Doug Te Moni, ko te nuinga o ngā tamariki pēnei ka mahue i ngā ekenga pai i ngā rā ka tae mai te marea.  He rā motuhake tēnei mā ēnei momo tamariki me o rātou whānau.

I kōwhiri te tarahiti o Trillian neke atu i te kotahi mano tamariki noho whakaraerae huri noa i te motu, hei mea whakakoakoa mō te rā kotahi.

Hei tā Ataria Heta nō Ngāpuhi, "He rangi whakahirahira tēnei mō ngā tamariki e māuiui ana, me ngā tamariki kua pā e te kino.  Nō reira he mihi nui ki te tū ki konei ki waenganui i tēnei rangi."

Te nuinga o ngā whānau nō waho kē i Tāmaki Makaurau, engari ehara tērā i te mea whakararu mō tēnei whānau.

Ko tā Te Moni whakamārama, he whakanui i a rātou te mahi, kia tomo mai ki te taiopenga nei kore utu.

Ka tuwhera te hui Funfest ki te marea āpōpō, ā, ko te whakapae tata ki te tekau mā rima mano tāngata ka tae atu ia rā. Engari mō ēnei tamariki he aro noa ki ngā whakamīharo o nāianei te mahi.