Kaupapa: Te Reo Māori

He rangahau e pā ana ki te reo o Patukoraha

  • Te Tai Tokerau
  • Tāmaki Makaurau

Arā te rangahau kairangi a tētahi ika-a-whiro nō Te Panekiretanga o Te Reo e titiro hohonu atu ana ki te orangatonutanga o te reo ake o tōnā hapū i Te Hiku o Te Ika.  I puta atu a Te Kāea ki te tūtaki atu ki a ia, kia whai māramatanga ai ki āna mahi. 

Pēnei i te au o te pioke ka kitea ki Rangaunu, e tūmanako ana a Hohepa Maclean ko te au o āna rangahau ka pari mai ki uta. 

“Āe, ka taea te kī tata mate rawa atu.  I raro iho pea i te rima pai hēneti ngā mea matatau.  Tērā pea ka kaute ki taku ringa kōtahi ngā tāngata e kaha nei ki te kōrero e matatau rawa atu ki te kōrero,” hei tā te kaiwhakauru PhD a Hohepa Maclean.

He kaiako reo Māori a Maclean ki Te Wānanga o Aotearoa.  Ko tāna rangahau kairangi ki te Whare Wānanga o AUT, e haere ngātahi ana me ngā mahi rangahau paerua kua oti kē i a ia, i waihangatia rā tētahi rautaki reo mō Te Patukoraha rāua ko Te Whānau Moana o Ngāti Kahu.

Ko te whāinga ināianei, he ine me te rangahau i te kounga o te reo Māori tuku iho o Patukoraha kia kite rā i ngā ahuatanga whakahiko, whakarata hoki e tupu matomato ai te hiahia ki te ako me te kōrero i te reo.    

“Ko te whakarite pea i tētahi āhuatanga, tētahi ao, tētāhi taiao e hihiko mai ai te tangata ki a ia otira ki te reo i roto, engari he uaua,” hei tā Maclean.

E ai ki a Maclean, kei te takiwa o te rima rau tāngata te tokomaha o te hunga e whakapapa ana ki Te Patukoraha, ā, mā te kawe i te mānuka nei, ka pakari ake te manaakitanga me te whakatupuranga o te reo o Te Patukoraha.

E ai kī a Hohepa, “Kāre tino nui ngā tāngata ka whakapā mai ki tēnei rangahau koia tētahi tino tohu.  Ko te tohu pea kāre rātou ko te mōhio kō wai ahau, me te mea hoki nei kua mararā nei te hapū, tērā te nuinga ki Tāmaki ki hea rānei, ko te mea hoki kāre pea he pānga o te reo ki a rātou.  Koira pea tētahi āhuatanga me whakatika i te tuatahi, me aro mai te tangata ki tōnā reo tuatahi rā,” hei tā Maclean.

Ko te rangahau a Maclean te rangahau reo Māori tuatahi pēnei e aro atu ana ki te hapū o Patukoraha.  Ko ngā hua katoa ka puta a te mutunga mai o te whai i te tohu kairangi hei te mutunga o te tau rua mano mā ono.