He rā whakanui i a Apihai Te Kawau kua whakarewaina ki Ōrākei

  • Tāmaki Makaurau

E whakanui ana a Ngāti Whātua Ōrākei i te rangi motuhake i waitohua ai e tō rātau tupuna a Apihai Te Kawau i te Tiriti o Waitangi.

Nō te ata tonu nei whakamānuitia ai te kaupapa nei ki te marae o Ōrākei, ā, ko te noho tahi me te hākari tahi te mahi nui.

E ai ki te poutaki o te iwi, e ai ki a Taiaha Hawke, he rangi whakahirahira tēnei mō te iwi whānui, ā, e hiahia nui ana te iwi kia whakamānawahia tēnei rangi hei ngā tau e tū mai nei.

Hei tāna, "Kei te anga whakamua a Ngāti Whātua Ōrākei ināianei. Kua hoki mai te whenua nā runga anō i te kerēme tuatahi o pāpā, te kerēme tuarua o te poari i te tau 2011, ā, mai i taua wā kua hoki hoki mai te whānau ki te noho ki runga i te whenua taurikura nei.

Kei te ora ngā kaumātua, kua ara ake anō te reo Māori i roto i a mātau nō reira ka tuku ngā whakamoemiti, ngā whakawhētai mō ngā hua i puta mai i roto i ngā mahi o ngā tūpuna."