He pōkēao nui e iri ana ki runga i te hapori o Camberley

Aroha Treacher
  • Te Tai Hauāuru

He pōkēao nui e iri ana ki runga ake i te iwi kainga o Camberly i te Matau-a-Māui, i te matenga o tētahi tamaiti, e whā tau noa te pakeke, i ngā rei o tētahi mihini kuti pātītī i Heretaunga inapō.

Ko Uetaha Dahtanian Ransfield Wanoa te ingoa o te tamaiti nei. Na ngā mātua tonu te ingoa o te mokopuna mataamua o te whanau i whakahua ake ki ta matou karere ki a Aroha Treacher.

Heoi, na te kaha o te whakarōau me te nguengue kei te whanau, kaore nga mātua i whakaae kia whakakanohitia mai o raua whakaaro.

Ko ngā putiputi he tohu o te mamae e kaikinikini ana, i ōna hoa e maumahara ana i aia.

Inapō nei, i mate tō rātou whanaunga, he whā noa ōna tau, atu i tētahi aitua mōrikarika.

I mau te tama ra i raro i ngā topatopa o te mihini-kuti-taru nei o te Kaunihera.

I te waahi i mate ai ia, i rere nga kare a roto o ana whanau, i a ratou e whai whakaaro ana mo tenei aitua i hua ake.

Ka tae mai te tupapaku o to ratou taonga mai i te kaitirotiro tupapaku, ko te inoi a te whanau, kia tukuna ratou kia tangi.

Kua tekau ma toru nga tau te kaitarawa e mahi ana ma te kaunihera, i tenei wa, kua waatea ia i tana turanga, heoi ka utua tonu ia. Ahakoa he mihini hou, e whakapono ana te Koromatua, kia tika ai te tu a te kaitaraiwa.

Ko tā te Koromatua ko Lawrence Yule ko taua tangata tētahi o ngā kaitaraiwa tino mohio o te Kaunihera, ko tāna ano i te whakamahia e ia tētahi mīhini hōū, ina ahakoa tōna tino mō`hio ki āna mahi i pupū ake tēnei parekura, na whai ano kua patua e taua tangata e te tino pouri mo te matenga o te tama.

I hua ake tenei aitua i raro i te mana o te Koromatua nei, no reira, kua tukuna e ia te ringa awhina ki te whanau, kia utua etahi nama o te tangihanga.

Kua tau mai te kapua hinapouri ki te whānau, te hapori whānau me ngā pirihimana hoki. E whakatewhawhangia ana tenei aitua e ngā Pirihimana, te Kaunihera me te Tāhūhū Hikina Whakatutuki.