Ngā kaupapa: Housing, Welfare

He nui ngā taumahatanga kei runga i Te Whare Whakaruruhau Wāhine o Kirikiriroa

  • Waikato/Te Waiariki

E pokea ana Te Whakaruruhau, i te nui o ngā māmā e tono whare āhuru ana mō rātou me ā rātou tamariki.  Kua kī katoa ngā rūma o ngā whare āhuru e rima o te rōpū nei, ā, neke atu i te ono tekau ngā whānau kei te rārangi e tatari ana, nā reira te tahuri o te rōpū ki te hapori kia āwhina mai i ā rātou mahi.

He whare hōu kua tākoha ki Te Whakaruruhau, hei whakangāwari ake i ngā taumahatanga kimi whare ā ngā pārurenga o tēnei mea te tūkino whānau.

Heoi ko tā Te Whakaruruhau e īnoi nei i te hapori whānui, kia taunakitia mai rātau.

Kua tino piki ake te toro atu o ngā parurenga tūkino whānau ki Te Whakaruruhau.  I tēnei tau nei e kī ana ngā tatauranga kei te takiwā o te tekau mā whā mano whānau kua whakapā atu ki ngā whare whakaruruhau o te motu, he 7000 o ēra ki Te Whakaruruhau.

Kei te takiwā o te 60 whānau e tatari ana kia haumarutia e Te Whakaruruhau, hei tā Ruahine, kei te takiwā o te tekau marama ētahi o rātau e tatari ana mo tētahi whare i te Kaporeihana Whare.

Tūturu, ko te pūtea taunaki tērā e wawatatia ana, heoi mā te aha i te tautoko a te hapori i te kore noa.