Ngā kaupapa: Crime, George Taiaroa

He ngaronga nui mo te whānau Taiaroa

  • Waikato/Te Waiariki

I te arahanga i Tirohanga, pātata atu ki Atiamuri, ā, ko te whakapae, i reira ia ka pūhia e tētahi kaitaraiwa.  I tīraha tōna tūpāpaku ki te wāhi rā mō tētahi wā roa, i ngā pirihimana e whakatewhatewha ana i tōna matenga.    

I te wāhi aituā a Te Kāea i te roanga atu o te rangi nei. 

Ko George Taiaroa, he 67 ōna tau, te hoa rangatira o Tākuta Helen Taiaroa, he mema mana nui o te kāhui whakahaere o te Wānanga o Raukawa.  Tokowhā a rāua tamariki, ā, he huhua hoki ngā mokopuna.

I kōrero mātou ki ētahi hoa o Tākuta Taiaroa, ā, ko tā rātou, kei Taupō te whānau e rūmene ana, e whiriwhiri ana me aha te aha.

I te rā nei i tatū atu ai ki Atiamuri, kei waenga i Taupō me Tokoroa, ā, he tika te kōrero he pito tūhāhā tēnei.

E rua noa ngā take e haere ai te tangata ki konei, ko te noho, ko te mahi rānei.  He rori nui te hangaia ake i konei i tēnei wā, nō reira koia pea tētahi take.

I kōrero a Te Kāea ki ētahi i te takiwā nei, ā, ko tā rātou nā te kaupapa rori nei te tangata i hari mai i ngā marama tata.  Kei te hōtera e taurimatia ana ko ngā kaimahi, ā, ko ētahi whare o konei kua rīhingia atu e ngā kamupene hanga.

I tau atu a Te Kāea ki te whare i nōhia e George, ā, i reira ōna hoa e huihui mai ana, hēoi kāore i pīrangi ki te kōrero mai.  Ko tā tētahi, he tangata arohanui a George, i riterite tāna hari pero ika atu ki āna hoa.

I mate atu a George ki te wāhi i hinga ai ia, ā, i waihō tōna tūpāpaku kia takoto ki reira inapō, tae noa mai ki te rangi nei.  Kua haria ake ia ki Tāmaki e ngā pirihimana kia tirohia.

E hiahia kōrero ana rātou ki ērā i te haere mā tēnei takiwā i waenga i ngā haora o te haurua i te rua ki te haurua i te whā karaka i te ahiahi.

Nōnatata nei ka puta te kōrero a te whānau pani e mea ana e tangi ana te ngākau mō tō tātou koroua, karangamaha kua kapohia e te ringa kaha o aituā, ōtirā i te ringa tāhae o te nanakia.

E mihi ana ki te  tokomaha kua tae mai ki te manaaki i te whānau.  Heoi anō e īnoi atu ana ki te ao papāho kia whakawāteahia mai te whānau i tēnei wā kia tangi, kia poroporoāki tō rātou koroua.

No te ahiahi nei ki tētahi hui mā te hunga papāho, ka puta i ngā pirihimana ēnei kōrero:

Nā, e meatia ana, ko George Taiaroa he uri o Ngāi Tahu, o Ngāti Māmoe nō roto i te rohe o Ōtākou. 

Kairīpoata: Heeni Brown.