Kaupapa: Api Mahuika

He ngarohanga nui te matenga o Apirana Mahuika ki te Hāhi Mihingare

Dean Nathan
  • Te Tai Tokerau
  • Te Tai Rāwhiti

Ahakoa nō Ngāti Porou tūturu a Tākuta Apirana Mahuika, kāore pea e mōhio ana te tini tangata i ngaro anō tēnei uri o Porourangi ki Te Tai Tokerau mō tētahi wāhanga i a ia e pakeke ana.  Ko ngā akoranga a te Hāhi Mihingare ngā mahi i whaia e ia.  I te rā nei, i kōrero mai te pīhopa o Te Tai Tokerau, a Te Kitohi Pikaahu mō te nohonga o tēnei rangatira ki waenga i a rātou i tāna whai kia tu ia hei hēpara o te whakapono.

He pokaka te rangi o runga i tēnei o ngā kainga nō ngā mihinare i te rongonga ake kua hinga tētahi o o rātou nā hēpara.

E ai ki a Pikaahu, “E hoa ka aroha atu au ki te iwi Māori i te ngaronga atu i tēnei o tātou rangatira.  Tēnei whatukura i a Apirana Mahuika e takoto iho nei i runga i tōna marae.  Te wāhanga ki te iwi Māori a puta noa i te motu, ā, te wāhanga anō ki te Hāhi Mihinare i te wa a ia e pirihi i roto i a mātou o Te Tai Tokerau tēnei ka tangi ake te ngākau koia kua poto ki te pō.”

I te kura mihingare o Hato Hoani, i noho tauira ai a Api me te maha o ngā akonga o Te Tai Tokerau kia tū a ia hei pou o te hāhi.

Ki tā Pikaahu, “Nā, ka puta mai a Api i te kareti, nā ka riro ki roto i a mātou Te Tai Tokerau i te tau ono tekau i te wā o tō mātou matua a Paki Tipene koia te Ati Rikona i roto o Te Waimate.  Te wā i o tātou mātua ia Tā Himi mā e ora ana na koia ēra ko ngā kaumātua i roto i te hāhi ki roto o Te Waimate Taumarere.”

Mai anō i taua wā kua puritia e ngā Mihingare o Te Tai Tokerau i te taura e here nei rātou ki a Mahuika, ā, me tōna iwi.

Hei tā Pikaahu, “Tae atu ki te mate o Hone Kaa ki Rangitukia nā te mātua Api te kauhou i puta i runga i tērā marae.  Ka rite tana kōrero mō Hone mō te apotoro nē. Koia au ka hoki ngā mahara ki tēnei o tātou matua nōna te hōnore anō i tōna nei tū ki roto ki te iwi Māori whānui koia nā kua takoto kua okioki i te wā nei.”

Hei te Wenerei whakaeke ai te marae o Te Rahui e ngā Mihingare.