Kaupapa: Tūhoe

He mōhiotanga hōu kua hua i te kaupapa Operation 8

  • Waikato/Te Waiariki

Kāti e ai ki te Upoko o Ngā Pirihimana, ki a Peter Marshall, i whakahaeretia ngā mahi tirotiro mo Operation 8 i roto tonu i ngā marama tekau mā waru, ā, he mea oti i te marama o Oketopa rua mano mā whitu.

Heoi, e ai ki ngā pārongo kei a Te Ururoa Flavell o te Pāti Māori, i whakahaeretia ngā mahi tirotiro kē mai i te tau rua mano mā rima tae atu ki te tau rua mano mā iwa, arā e rua tau o mua, a muri atu hoki i te wā o te urutomo.

Koinei te wā tuatahi kua tatū mai te Upoko o Ngā Pirihimana ki te Kōmiti Whiriwhiri Take Māori.

E ai ki a Te Ururoa Flavell kua riro i a ia etahi paarongo mō ngā mahi tirotiro a Ngā Pirihimana i te wā o Operation 8, he tirotiro whanui ake ki ta te motu i whakāro ai, otira kei waho atu anō hoki i te rohe pōtae o Ngāi Tūhoe.

Hei tāna anō, “Kei reira ētahi Māori kāore i raro i tērā āhuatanga o te Operation 8 otira ētahi rōpū.  Mēna ka āta tirohia e te motu te hohonutanga o ngā ingoa o runga i ēnei kōrero tera pea ka tūmeke rātou.”

E ai ki ngā whakamarama, he tāngata Māori he rōpū Māori mana nui i tirohia.  Kāre ano kia whakamanatia ngā parongo e te tari pirihimana, engari e whakapono ana te kaiarahi o te Paati Māori he tuturu.

E ai ki a Peter Marshall tekau mā waru marama te roa o Operation 8.  Engari, e ai ki ngā pārongo i whakahaeretia ngā mahi tirotiro mō ngā tau e whā.

Kāti hei te paunga o tēnei wiki tukuna ngā pārongo ki te Upoko o Ngā Pirihimana, hei reira kitea ai mēna he tika, he teka rānei.