He matenga tino pōuri kua pā ki tētahi whānau nō Waimana

  • Waikato/Te Waiariki

I roto i tētahi o ngā whakaahua whakamutunga o Ben Tekira he māmā noa iho te kite i te hari o tōna āhua me te wairua māhaki o tēnei tangata. Ko te mea pōuri e kore e roa i te rapunga o tēnei pikitia i mate ohorere ia.

Ko tā Timi Tuwairua, te pāpā whāngai o Tekira, kātahi te āhuatanga pōuri ko tērā. Ko tāna anō ehara te kapua pōuri kua tau ki runga i te whānau anake, engari ki runga i te katoa o te whārua o Waimana Kāku. Ko tā te teina whāngai o Tekira a Cornellius Wallace, i pōhehe ia ka noho ora tonu tōna tuakana mo ake tonu atu nā te kaha o tōna tinana me te koi o tōna wairua.

Nō te poupoutanga o te rā inanahi, ka puta atu a Tekira rātou ko āna teina tokowhā ki te hī i te ngutu awa o te Mōtu. He rēhia kua aua atu e mahia ana e te whānau Tuwairua. Ko tā Timi Tuwairua, i kitea tōna tama i tētahi tangata e hī ika ana ki tērā atu taha o te awa, nō reira i ngana ia ki te whakawhiti atu ki taua wāhi hī ai. Heoi anō, hei tā ōna hoa hī, tōna kotahi mita noa iho te tawhiti atu ōna i tērā atu taha o te awa, ka totohu a Tekira ngaro atu ai. Nā wai i waeahia atu ngā ratonga whawhati tata, te tari pirihimana hoki i te whā karaka, ka kitea te tūpāpaku i te takiwā o te waru karaka i te pō.

Ko tā Timi Tuwairua i te noho tonu te whānau i reira i te wā e rapu haere ana ngā ratonga ohorere i a ia, otirā i reira rātou i te wā i kitea tōna tūpāpaku, ko tāna anō i oma atu te katoa o te whānau ki te moana ki te tiaki i tā rātou tama.

Nā te whererei marika o te kōtore me te haehae o te ngākau, kāore ngā hoa hī ika o Tekira i whakaae kia kōrero kia mātou i tenei wā. Heoi anō, ahakoa te kino o tēnei aituā, he harikoa hoki nō te whānau i kitea te tūpāpaku. Ko te whakatau o tāna teina ko te mea nui ka whakahokia a ia ki tōna ūkaipō takoto ai.

Hei te pō nei whakahokia mai ai te tūpāpaku e ngā kaitirotiro tūpāpaku i Kirikiriroa, ki te marae o Piripari, hei tangi mā āna tamariki tokorima, me tōna iwi e whanga mai ana.

Kairīpoata: Kereama Wright.