He māmā noa te whakautu ki te iti o ngā kaiako Māori - Tāwhiri Williams

Leah Te Whata
  • Tāmaki Makaurau

Ko tā te kaiwhiwhi i Te Tohu a Tā Kingi Ihaka, ko tā Tāwhiri Williams, he māmā noa te whakautu ki te iti o ngā kura māhita reo Māori - kia whakaako i ngā kaiako o nāianei i te reo me ngā tikanga.

Kotahi rau waru tekau mano ngā tamariki o Aotearoa e ako ana i te reo Māori ki ngā kura kaupapa, kura auraki hoki. Ēngari, ko tā Tāwhiri Williams, kia akona te reo Māori e te katoa.

"Ko te reo Māori te reo tūturu te reo taketake te reo motuhake o tēnei whenua nō reira me noho to tātou reo hei reo tangata whenua tonu ki roto i ngā kura katoa."

E tohu ana te kāwanatanga i te whitu ira ono mirioana tāra ki ngā rauemi mātauranga reo Māori mō ngā tau e whā, ā, kua puta te whakatau a te Mīnita Mātauranga a Nikki Kaye mō te korahinga ake o te rautaki whai kaiako rua tekau miriona tāra ki Tāmaki.

"Ka hiahia rātou kia rahi ake kia maha ake ngā tāngata matatau ki te reo me ngā tikanga me te ngaiotanga te koungatanga o te reo kia noho hei kaiako pai hei tangata pai."

Ka hē kē atu ngā tatauranga kaiako Māori mēnā ka whakaturehia te ako reo Māori ki ngā kura katoa. Ko tā Tāwhiri Williams, kia ako ngā kura māhita i te reo me ngā tikanga Māori ka ea te taumahatanga.

"Kei te wātea tēnei wānanga ki ngā manene katoa ki ngā rāwaho katoa mēnā ka hiahia, kuhu mai ki kōnei ako ai te reo me ana tikanga katoa. Māku tonu rātou e whakangungu kia puta atu ki roto i ngā kura katoa hei kura māhita kounga, ngaio tonu hei whakaako i tā tātou reo me ā tātou tikanaga."

Ko Tāwhiri rāua ko tōna wahine a Kaa Williams ngā kaiwhiwhi i Te Tohu a Tā Kingi Ihaka i ngā tohu Waka Toi. Ka whakanui ngā tohu Waka Toi i te angitū a ngā tohunga mahi toi Māori.