He kupu tūpato nā te whānau o Mihinui Tamiana

Mere McLean
  • Waikato/Te Waiariki
He kupu tūpato nā te whānau o Mihinui Tamiana, tekau mā whā tau tōna pakeke ka mate, i muri i te putanga whakawā mō tōna matenga nā tētahi weranga whare i Rotorua i te tau rua mano tekau mā toru. 
 
He whakatūpato tā te whānau o Mihinui Tamiana, tekau mā whā tau te pakeke ka mate, ki ngā mātua huri noa. 
 
E rua tau whai muri mai i tōna matenga, ko te kaikinikini o te mamae e ngau tonu ana.
 
I mate a Mihinui i ngā haora mōata o te tuarua o Pīpiri i te tau rua mano tekau mā toru koia tētahi o te tokorima i te moe ki tētahi wharau i wera.  
 
I te whakawākanga mo tōna matenga ka puta te kōrero, i te moe rātou ki papa kē o te whare, kāore ōna putanga tika.  
 
I taua pō tonu, i te haurua o te tekau mā tahi karaka i tae ngā pirihimana ki te aukati i tētahi pāti. Heoi nō te haurua o te rua karaka, ka hoki ētahi taiohi tokorua i panaia, ki te whare, ka kite i te ahi, ka whakaara ake i ngā ratonga.  
 
E rua ngā mīhini hiko pēnehīni i te kīhini, kīhae he ara whakaputa hā, i reira ēnei taonga hei whakakā i ngā rama me ngā puoro.  
 
Ko ngā kōrero i puta i a Heihana Kaikimihara i a John Wilson o Rotorua me te apiha ahi me Stuart Bootten, tokowhā o ngā taiohi o roto, i hūpeke atu i ki te papa o raro, wha ira tahi mita te hekenga.  
 
E toru o rātou i whara, te tuawhā i tino whara nā te kaha wera o te ahi.  Ko tā Wilson, i mataku a Mihinui, i reira ka mau ia i te auahi me te wera.
 
Ahakoa ngā urupare a te whānau o Mihinui e iri tonu ana, ko tā rātou he kimi i te maungarongo, a, kia noho ko ngā raumahara mō te hākoakoa o Mihi hei piringa.  
 

E manako ana ngā pirihimana mā ngā whāinga o te arotake mō te matenga o Mihinui e whakaotia tonutia nei, ngā pātai a te whānau e whakaea.  

Ko te whakamārama ake a ngā Pirihimana, i ngā whakatewhatewhanga mate, ko tā ngā pirihimana he kohi, he whiriwhiri i ngā kōrero me ngā taunakitanga kua puta, ā, inā eke ana aua taunakitanga i te pae e tutuki ai tā te ture hāmene i te kaihara, ka haria ake taua take ki te kōti. 

I tēnei take, kāore ngā taunakitanga i eke, ā, kāore he tangata i whakatuakingia. Hēoi, ki te ara ake ētahi kōrero hōu, ka whiriwhirihia aua kōrero e ngā Pirihimana.