Ngā kaupapa: Politics, Te Arawa

He kōrero tā Te Arawa mo te huringa āhuarangi

Mere McLean
  • Waikato/Te Waiariki

I whai wāhi a Rotorua ki te whakapuaki i o rātou whakaaro mo te ara kōkiri a te kāwanatanga i ngā take āhuarangi. I tūtaki ngā māngai o te Manatū Taiao ki te hapori me Te Arawa ināpō kia kite me pēhea e whakaheke ai ngā tukunga waro i mua i te tau rima tekau.

Koinei tētahi o ngā hui tekau mā rima a Te Manatū Taiao mo ngā tikanga whakahaere o te pire hōu Zero Carbon. Ki tā Janine Smith o te Manatū Taiao “I whakatūhia tēnei pire kia aro ki ngā tirohanga whakamua me pēhea hoki te takahuri i ngā take ōhanga”. Ko te whainga o tēnei pire kia whakatakoto i tētahi paetawhiti hei whakaheke i te puha hau rehu hei te tau rua mano rima tekau. Kua whakatūhia e Te Arawa tētahi kāhui hei tirotiro ki ngā huringa āhuarangi, ā, kua korero ngātahi rātou me te Manatū mo tēnei kaupapa.

“He mea nui kia korero tahi mātou ki a rātou e pā ana ki ngā uauatanga mo Te Arawa, ā, hei whai whakaarotanga mo mātou i te wā kei te hanga mātou i tēnei ture hōu kia aro ki ngā whakaaro o ngā iwi, Māori me ngā whakawhiu”, e ai ki tā Smith. E ai ki te kāhui huringa āhurangi o Te Arawa e noho ana i raro i ngā whakahaere o te pōari roto moana o Te Arawa, ko te pikitanga o te wai ki ngā roto tētahi o ngā whakawhiu na runga i te huringa āhuarangi. “Kei te kaha rātou ki roto i o rātou tikanga whakahaere mo te huringa āhuarangi hei whakaarotanga ā rohe”. Ka tū te hui whakamutunga mo te pire Zero Carbon i tēnei pō ki te Tonga o Tāmaki Makaurau.