Kaupapa: Koroneihana

He kōrero mō te hauora o te Kīngi

  • Waikato/Te Waiariki

Kāre i puta ā-tinana atu a Kīngi Tuheitia ki te pae o Tūrangawaewae ki te whakatau i ngā mate o te motu i te ata nei.

Nā konā tipu ake ai te mānukanuka o ngā iwi mō te hua o tōna ora.

I kōrero motuhake ake a Te Kāea ki te māngai mō te whare o te Kāhui Ariki, kei te ora a Tuheitia.

Nā ngā iwi me ngā hapū o Waikato whānui me te whare Ariki o te Kīngi i whakatau ngā ope me a rātou mate i te rā nei, ahakoa kihai a Tuheitia i kitea a kanohi, ehara i te mea kahore ia i reira.

Hēoi mō te taha ki te ora o te Kīngi a Tuheitia, hei tā Te Rangihiroa Whakaruru, kua whā tau te Kīngi e pokea ana i ngā māuiuitanga o te hauora, ko te matehuka tonu tētahi.

I whakaekea te marae o Tūrangawaewae e te tino manomano i runga i tēnei āhuatanga mai rāno e whakamanahia ana e Waikato Tainui i raro anō i te mana o te Kīngitanga.

Hei tā Mamae Takerei, “Ko Waikato anake te iwi kei te kawe i tēnei tikanga, he tikanga i ahu mai, mai rano mai rano mai rano, i hinga ai te nuinga mō te whenua te take, i tū ai te Kīngitanga mō te whenua te take, hei honohono i ngā iwi nō reira koinei te tikanga o tēnei rā ko te kawemate o te wairua o rātou kua hinga, kua ngaro ki te pō.”

Otirā, e matapaetia ana ka puta te Kīngi Māori ki te whakanui i tōna rā Koroneihana apopo, ā ma ngā tautoko a tōna whānau a tōna iwi, me ngā iwi whānui o te motu aia hei whakakaha.

E ai ki a Rahui Papa, “Ko āpōpō te rā nui a ka tūponotia atu ka puta mai me te pai o te paki o te rangi, akuanei pea ka puta mai.”

Ki tā Takerei, “Ko te wairua o rātou kua ngaro e whakapakari nei iaia, i roto i te pātai o te whakāro ka puta mai? Ka puta mai i roto i te ora.”