Kaupapa: Housing

He kohinga nohoanga tūnohunohu kua tūwhera i Kirikiriroa

  • Waikato/Te Waiariki

Kua mahi ngātahi Te Rūnanga o Kirikiriroa me Te Tarahiti o Te Rauawaawa, kia whakatūwherahia ai ētahi kāinga e rima i te rā nei, hei whakaruruhau mō tūnohunohu mā, otirā, mō te hunga kaumātua.

Koinei te kohinga nohoanga tuarua kua whakatūria ake ki te papakāinga Kaumātua o te tiriti o Moa, ki Kirikiriroa, ā, hei tā te Minita o Whānau Ora, hei tā Tariana Turia, koianei ko te whakatinanatanga o ngā mātāpono o Whānau Ora.

Nā te whai wāhinga atu a Te Rūnanga o Kirikiriroa, ki ngā mahi rino a tana pakihi ake, a Rezlab, ka tūwhera ai ngā tatau ki te hoko whenua, me te hanga hoki i ngā kāinga tuatahi.

E kawea ngātahitia ana te kaupapa o te taumarumaru mō ngā kaumātua kuia nei, e te Rūnanga o Kirikiriroa rātou ko te Tarahiti o Te Rauawaawa, ā, ko te Rauawaawa tērā, ngā ringa rehe e tiaki ana i te hunga kaumātua, kuia, kia haumaru ai te noho.

I te rā nei, i tae mai hoki ko tētahi tira o te Whenua Moemoeā, e kawe ana i ngā kaupapa toko i te ora, kāinga kore hoki ki o rātou whenua ake, me te aha, e taki haere ana rātou i te motu ki te whai akoranga i te Māori o Aotearoa.

E iwa rau rima tekau mano taara, te utu mō te whenua me ngā kāinga e ono nei tae noa ki te mutunga ake o ngā mahi, ā, ināianei e mahi ngātahi ana Te Rūnanga o Kirikiriroa, rātou ko te iwi o Waikato-Tainui, kia hanga whare pai te utu mō te iwi, ki te tiriti o Shakespeare i Kirikiriroa tonu.