Kaupapa: Touch Rugby

He kōhanga whutupōro tā te karapu Ories mā ngā taitamariki iho i te rima tau

  • Te Whanganui-ā-Tara

Kua puta i te karapu whutupōro a Oriental-Rongotai ngā kaitākaro Ōpango, a Ma'a Nonu rāua ko Julian Savea, ā, nō rātou hoki ko te poumua ō mua o te kapa Lions, a Whetu Henry, me te aha, kei te whakapono rātou koinei te timatanga noa.  Kua whakarite te karapu e tū ana ki Miramar, tētahi kōhanga whutuporo mā te hunga taitamariki iho i te rima tau, hei poipoi i te pito mata e pihipihi ake ana.

E ai ki te kaiwhakarite o te kōhanga whutupōro nei, ki a Mason Malagamaali'i, mā tēnei kaupapa e pūāwai ai ngā pūmanawa o ngā kōhungahunga nei, ahakoa pea ngā roimata i ōna wā.

Ko tā te kaiurungi o te tīma matua, ko tā Whetu Henry, me mātua whakawhānui te puna kaitākaro kia eke ai te karapu ki ngā pae o angitu.  Ā, e tautoko katoa ana te poumua ō-mua o te kapa Raiona i ngā mahi ki ngā kapa teina.

Puta ana i a rātou he kaitākaro Ōpango, Hurricanes, Raiona hoki, ka whakatinana te karapu Ories i te kōrero, iti rearea, teitei kahikatea ka taea.

Kāore e kore ka whai ngā tamariki i ngā tapuwae o ngā mema tuakana o te karapu, ka kake haere i te ara poutama ā ngā rā ki tua.