He kēnge kua hono atu ki te whawhai mo ngā tamariki rawa kore

Te Kāea
  • Waikato/Te Waiariki

Rua tekau mā rima ngā kura o Waikato ka whiwhi tina ia rā mai i tētahi kēnge e kīia ana ko Tribal Huk, he kēnge e hiahia ana ki te panoni i ngā whakaaro a te hapori mō rātou.

I hopu o mātou kāmera i tā rātou kaupapa kirihimete, i reira tohaina ai he tāonga ki te kotahi mano tamariki o Ngāruawāhia. 

E mīharo ana ēnei tamariki o Ngaruawāhia. 

Kaua e tumeke e hika mā na te tāenga moata mai a Hana Koko.

Ko Jamie Pink perehitini o Tribal Huk te kaiwhakakite i te kaupapa nei hei āwhina i ngā whānau maha, e pokea nei e ngā kino o te wā.

Tika tonu, ia ata ka taka ngā mema kēnge o Tribal Huk i te rima rau hanawiti, nā ō rātou anō pūtea i hoko, ka toha atu ki te rua tekau mā rima kura i roto o Waikato.

Puta noa i te motu he rua rau whitu tekau mano tamariki e noho pōhara ana, koia te tino wero kei ngā ngutu o Tribal Huk.    

Nōreira ahakoa te whakawhiu ka ūtaina ki runga i ngā kēnge nei, he tira mana nui a Tribal Huk ki te hapori nei.

E anga atu ana a Tribal Huk ki te tau hou me te hiahia kia rahi ake ngā kura ka whakawhirinaki atu ki te kaupapa koha kai nei engari mō nāianei kei ngā tamariki o Ngāruawāhia te wā.