He kawhe ki te ngutu, he reo Māori ki te arero

  • Tāmaki Makaurau

Hai whakamānawa i Te Wiki o Te Reo Māori, he wāhi kōrero Māori, inu kawhe hoki i whakatūria ki Te Taunga Tereina o Manukau, i raro i te tuanui o Te Whare Takiura o Manukau.

Hei tā ngā kaiwhakarite o Te Puni Kōkiri, i tua atu i te tuku kawhe kore-utu ki te hunga whakamātau i te reo, ko te matū, kia au noa te rere o te reo ōpaki ki ngā wāhi tūmatanui.

Ko tā Eruera Morgan, “Mēnā rā he kai ka horaina, ka haramai te iwi. Otirā mehemea ka horaina te kawhe, ā, kua kite ake tātau kua tae mai te iwi, kua tae mai a-tini ngerongero mā ki te aha ki te whāinuinu i te puna wai o te kawhe.”

He kawhe kore utu, heoi, me kōrero Māori i te tuatahi.

“Ko te kawhe hei mounu hei whakapoapoa mai i te iwi kia hāpai kia kōrerotia e rātau te reo Māori, kātahi ka riro i a rātau ō rātau kawhe,” tā Morgan.

Ko te wiki tēnei o Te Reo Māori, nā Te Puni Kōkiri tēnei kaupapa i whakarewa nā rātau a Coffee 2 You i pōhiri hei hora i ngā kawhe, ā, hei whakakōrero i te tangata.

“Kua rere te kōrero, kua rere te inu kawhe, kua rere hoki te whakahoahoa o te tāngata ki tēnei takiwā o Manukau.”

Hei tā Eruera Morgan, ko te ngako kia ākina te rere te reo ōpaki ia rā, ia rā.