He kaupapa whakaora paepae

Leah Te Whata
  • Tāmaki Makaurau
  • Waikato/Te Waiariki

Ko Waikato - Tainui tērā e urungi ana i tō rātou ake waka reo. Kua rewa te wāhanga tuawhitu o tā rātou rautaki reo Māori, ko Te Pae Kākā te ingoa. Ko te haepapa ki a rātou ko te whāngai i ngā puna kōrero ki ngā marae hurinoa i te rohe.

Ma wai rā e taurima i ngā Marae o Waikato Tainui? Ko te tūmanako ia, mā te hunga nei e pīkoko ana ki ngā tikanga Māori.

E ai ki te mātanga reo, ki a Pānia Papa, "E matemate haere ana ngā kaumātua, te hunga e pupuru nei ki ngā mātauranga tawhito, me te reo anō hoki."

Ko tā Rahui Papa, "E hiahia ana kia whakahokia mai te reo, kia whakahokia mai te kōrero, e kākā mai anō rā ō tātou paepae."

Nā te iwi tonu te kaupapa o Te Pae Kākā i utu, he whakatauira i te mana motuhake, he whakapakari mita, he whakaū tikanga ā-iwi anō hoki te mahi.

E ai ki a Pānia Papa, "Me tino kaha ngā iwi ki te whakapakari i a rātou anō, koirā te huarahi ki au ki te rangatiratanga, ki te mana motuhake.

Ko tā Rahui Papa, "Ki te tukuna mai e rātou he herengi kotahi ki roto i te kaupapa ka pōhēhē te kāwanatanga ko rātou te rangatira."

E rua tekau ngā ākonga, ā, ko te kaitātaki wahine o Te Iti Kahurangi, ko Tiare Teinakore tētahi. Ko tāna, "Ko te haramai ki te ako ki te noho ki ngā rekereke o ngā kaiako."

He tauira a Vince Hapi ki Te Pae Kākā, ā, ko ia tētahi o ngā kaikōrero ki tōna marae. Ko tāna, "Ki te whakakī i ngā whāruarua ki te whakatakoto ake anō i te tūāpapa o tēnei mea te whakarauora."

He iwi kua rūmakina ki ngā tikanga tuku iho, ko tōna toru tekau mā tahi ōrau te nui o ngā uri o Waikato Tainui e matatau ana ki te kōrero Māori. Ko tā Teinakore, ehara i te mea ko te reo anake te aronga.

"I tae mai au ki te ako i nga korero tuku iho, nga karakia, i nga waiata, etahi pea kaare e tino kitea e Ngati Hāua. Ahakoa kotahi haora, hāwhe haora, rua haora pea te tawhiti mātou mai i a mātou, he rerekē tonu ngā tikanga."

Ko tā Rahui Papa, "E hiahia ana kia whakapūmau anō rā ko ngā waha kōrero o Tainui, ka tū ana ki te marae ka mōhiotia, ā, he Tainui tēnei tangata."

E iwa anō ngā wānanga kei mua i te aroaro o te iwi, e ihu oneone ana i te whanaketanga o te reo e noho mōrearea nei.