Kaupapa: Housing

He kaupapa whakangao pūtea hei hoko whare kaporeihana

Aroha Treacher
  • Te Tai Rāwhiti

Kei te āta tirohia e te Kāwanatanga tētahi ara hōu e riro ai ngā whare kaporeihana i ngā rōpū ā-hapori. 

Ko tā te Minita Take Whare, tā Nick Smith mahi, he peka ki ngā tōpito o te motu ki te tono atu ki ngā iwi kia whakangao pūtea atu ki te kaupapa.

He ono tekau mā iwa mano neke atu te rahi o ngā whare kaporeihana ki Aotearoa nei, katoa o era e tiakina ana e te kāwanatanga, heoi, mā te pire hōu o Social Housing e panoni ai tērā.

Nā runga i tēnei hanganga hōu, ka riro ki ngā rōpū hapori, he rua tekau paiheneti o ngā whare kaporeihana katoa, mā rātou aua whare e tiaki ai.

Ki te tuku pūtea whakangao e ngā rōpū hapori, e hia miriona tāra ka penapenahia e te kāwanatanga.  E ai ki ngā tatauranga, he ono rau miriona tāra i ngā tau e toru kua hori i whakapaua e te kāwanatanga, mō te whakatikatika i ngā whare kaporeihana noa iho.

Kei te whai whakaaro tonu a Kahungunu i te tono a te kāwanatanga.  I te Hongongoi i whakatūwheratia tō rātou whare kāwanatanga tuatahi, he whare kaumatua.  He tū ngātahi o te iwi me te kaporeihana whare. 

Ka taea tonutia ngā kairiihi te whiwhi pūtea āwhina, ōrite tonu ki ngā kairiihi kaporeihana.  Heoi, ka utua te moni tūmā ki ngā rōpū hapori, ka taea hoki e rātou te whai āwhina hei hoko i ētahi atu anō whare.