He kaupapa kua whakaritea hei ārahi i te hunga rangatahi ki te ara tika

  • Te Whanganui-ā-Tara

Kua huripoki te ao o tētahi rangatahi o Te Whanganui-a-Tara, nā ngā mahi hāpai a tētahi iwi, nā rātou ia i ārahi mai i te ara o te kino. Ko Crewz Stone-Nepia tētahi o ngā pia waru tekau o te kaupapa karo hara a Te Rūnanganui o Taranaki Whānui ki Te Ūpoko o te Ika a Māui, he kaupapa me whakatū ki rohe kē, e ai ki tētahi o ngā tino āpiha pirihimana o te motu.  

I ngā marama kua hori, i whai a Crewz Stone-Nepia i te ara o te taihara. Engari i tenei ra, kua whai i te ara o te tika.

I ētahi marama ki muri ko tāna i te inu waipiro ia me ōna hoa, a ko te mutunga mai i huri rātou ki te tāhae waka.

Whai muri i tēnā i mauhere ngā pirihimana i a Crewz me ōna hoa, a i tukuna atu ia ki tētahi kaupapa whakakore i ngā mahi taihara ki Te Rūnanga o Taranaki Whānui.

Ko tā Neville Baker he māngai mo te kaupapa i āta tirohia e rātou ki ngā mahi i te tino hiahiatia e Crewz te whai, ko te mahi pāmu tera, mea rawa ake i whakaritea e te Rūnanga he haerenga mōna ki te awa o Whanganui hei kite i ngā hua ahuwhenua. Na whai ano he mahi pai kua puāwai mai mo te tama nei.

E ai ki a Neville Baker, ma te kaupapa nei ka taea e te iwi Maori te whakatika i o ratou ake raruraru, ko tāna ana ma te mahi tahi me te whai te hua pai ka tāea te hapori Māori katoa te whakatika, te āwhi hoki i te hunga rangatahi e hāere kotiti ana.

A kei te tino tautoko te āpiha pirihimana a  Wally Haumaha i te whakawhanaketanga o tēnei kaupapa ki nga Rūnanga puta noa i te motu.

Kāre e kore no Crewz te marinanui kua huri ia ki te tika, kia kaua ai e taka ki te hē, a ko te tumanako kia pērā ano ētahi atu hei ngā tau e tū mai nei.