He kāri whai potae ure kua whakaritea hei whakangāwari i te hoko

Aroha Treacher
  • Te Tai Hauāuru

Ano nei he tikiti tereina, tekau ma rua ngā wahanga ki te kāri, otira, ki te whiwhi i to kete potae ure, ka werohia te tikiti.

Terā te whakamā ka hoko potae ure ana te mātātahi, nāreira, mā roto pakete moremore tāea ai aua mea te hoko, kaore hoki he patai i rere, hei whakamāmā i te rangatahi.

Ko tā tētahi Kaiwhakaranu ko Megan Reynolds, "i te huri ētahi ki te whānaki potae ure na te whakamā ki te hoko."  

Ko tēnei toa whakaranu tetahi o ngā toa e whitu o Te Matau a Maui e whariki ana i te kaupapa potae ure nei.

Ma ngā nēhi me ngā kaimahi rangatahi ngā kāri e hoatu ki ngā rangatahi, tekau ma toru ki te rua tekau ma wha te pakeke.

Heoi, kua toko ake nga patai, akiaki onioni kē tēnei kaupapa i te rangatahi. Natemea, ka taea ngā matatahi tekau ma toru ngā tau te whiwhi potae ure mo te kore utu, ahakoa, e ai ki te ture, he tekau ma ono tau te pakeketanga whakaāe ki te onioni.

Ko tā te kaimahi hauora ko Michele Grigg, "he kaupapa tēnei ka taunaki i te hunga rangatahi ki te kōrero ki te hunga pakeke mēna he pātai he āwangawanga tā rātou mo te mahi onioni." 

He teitei ake ngā tatauranga mo te hapūtanga o ngā kohine Māori ki era o iwi ke, ka mutu, ko te ito o te kāri, kia karo ai ngā mate, ngā haputanga me ngā materoto.

Na te poari hauora o te Matau a Maui i utu, otira, e tumanako ana ka toro atu tēnei kaupapa ki te motu whanui.