He karanga kia aukati i te mahi riri tarāwhare

  • Te Tai Tokerau

E tuohu ana ngā haki o te Marae o Korokota, he tohu o te ngākau pōuri mō te matenga o Patricia Ann McGrath, ko te riri tarāwhare te take i mate a ia. E ai kia John McGrath te tungāne o Patricia, i whakaputahia e rātou tētahi karanga ki te hapū me te iwi kia tū mai ki te aukati i aua mahi ki waenga i ngā whānau Māori.

Ko tā te whānau pani kāore rawa he ngākau matakawa ki tōna hoa rangatira ō mua a Phillip Mahanga, kua hāmenetia mo te mahi tūkino i a ia. Ko tā John McGrath anō, kaore te whānau i te rata atu ki tāna tāne mai tā rāua hononga tuatahi. Heoi, ko tāna anō i wehe atu a Patricia ki tōna whānau mō ngā marama 14 nā tā rātou kore hiahia ki te tangata rā. I te mutunga ake ko tā te whānau he whakaritenga tērā nā Patricia e kore rātou e tāea te pēhea.

I riro te whakaminenga i whakarauika atu ki reira he rīpene mā, he tohu tērā o te whakamatāratanga me mutu te riri tarāwhare. Ko tā Hori Tuhiwai he rā hei whakanui i te karanga ki te whakakore i aua mahi tūkino, ki te wāhine, ki te tāne, ki te tamaiti rānei.

Kua rima tau a Patricia e mahi ana mo te tari Hiranga Tangata ki Whangarei, e ai ki te kōrero he wahine whakahoahoa i ngā tāngata katoa. E ai ki tētahi o ōna whaea kēkē he pono te kōrero he wahine kaha ia, heoi, kātahi te ngākau hūmarie.

Tokorua āna tamariki, kua piri rāua ki tō rāua papa i tēnei wā. E matapaetia ana ka tau pea ētahi atu hāmene ki runga i a Phillip Mahanga kei rō whare herehere i tēnei wā tonu.

Kairīpoata: Aroha Treacher.