Ngā kaupapa: Business, Environment

He kaiwhakataetae hōu a Maranga Station kei te pae o angitū me ngā toa ahuwhenua Māori

updated Aroha Treacher
  • Te Tai Tokerau

Kei waho tata atu o Tūranganui-a-Kiwa, ko te pāmu o Maranga e whakahaerehia ana e te whānau kotahi.

Otirā, he pāmu kua whai mana ki waenga i ngā pakihi ahuwhenua nunui, whai muri i tāna whakaingoatanga ki ngā whiringa whakamutunga mō te taonga Ahuwhenua Māori.

Kō atu i te rua rau ngā tāngata i tae mai ki te kite i te take e tāpua ai a Maranga i ētahi atu pāmu.

Kua rua tekau ngā tau e whakapau kaha ana a Janice rāua ko Marty i tēnei pāmu kau me te hipi, kia angitu ai ngā whakahaere pakihi a te pāmu nei.

Ko tā ngā kaiwhakahaere Ahuwhenua, ko te mea miharo o te whakataetae i tēnei tau, e rua o ngā whiringa whakamutunga, he whānau kē. Otirā, he āhuatanga kāore anō kia kitea nō ngā tau iwa tekau.

Ko rāua tētahi o ngā whiringa whakamutunga e toru i tēnei tau, ā, hei te pō whakanui a te rua tekau mā iwa o tēnei marama ka mōhio, ko wai ka wikitoria.