He kaimahi Warewhare e hīkina ana te reo Māori

Heeni Brown
  • Tāmaki Makaurau

He kaimahi Warewhare e hīkina ana te reo Māori me te kōrero i te reo Māori ki ngā kaihokohoki, ka mutu ki tētahi wāhi kāhore e kaha kōrerotia ana.

Whā tekau mā waru ngā tau o Ata Marsh, ā, mō te whā me te hawhe tau ia e kōrero Māori ana ki tēnei wāhi mahi ōnā.

Tā Ata Marsh o Waikato, "Tokowhā noa iho ngā tāngata kua kōrero kino mai ki a au, ēngari ko te nuinga he pai katoa ngā kōrero. E tūmanakohia ana, mō te hunga kua pā mai ki a au me taku reo Māori ka tau ko tētahi whakaaro ki roto i a rātou kia haere atu ki tētahi wānanga ki te ako i te reo Māori pēnei i a au me taku reo Māori."

Kāhore hoki ia mō te mea atu e mātau ana ia ki te reo, ēngari ka whakamātau ki ngā wāhi ka taea e ia.

"Mōku ake, kua kaumātua ēngari he uaua māku te pupuru i te reo, kāhore hoki e pērā ana ki ngā tamariki he māma anō mō rātou te pupuru. Ēngari nā taku kaingākau anō ki te reo ka kore hoki e maharahara ka haere tonu i tēnei haere ōku."

Tā Ata, e kore e mutu te kaupapa i konei, ka anga mua tonu ki te hiki ake i te kōunga o tana reo.

"Ā ngā rā e haramai nei, ā tērā tau, ka haere au ki te ako i ngā paerua tahi, rua anō hoki mō te reo Māori kia piki ake te taumata o taku reo, kia hāpai anō hoki aku mokopuna me te whakaako anō i a rātou te reo Māori."