He kaiako o Te Ataarangi ka whakanuia ki ngā Tohu Reo Māori

  • Te Tai Rāwhiti

I whakatōpu ngā kaiarataki reo māori o te motu ki te whakanui i ngā Tohu Reo Māori tua ngāhuru. Nā Ngāti Kahungunu me Takitimu waka te kaupapa i kawe, me te mea hoki rā, nā tētahi uri nō roto mai i te iwi, te tohu hautū i ngā mahi reo Māori i kapo ake.

Ko te ao o Mana Elizabeth Hunkin, he whāngai i te reo rangatira, "No reira kia ahau ehara nāku tēnei tohu nei, nō te whānau katoa," hei ko tāna.

Neke atu i te rua tekau tau a Whaea Liz e whakapeto ngoi ana ki te whakaora i te reo o tōnā iwi o Ngāti Kahungunu. I whakamanahia āna mahi ki te Ahurewa Tohu Reo Rangatira.

"Ka kite i te āhuatanga o Te Ataarangi, ka mōhio au, hika, anei tētahi huarahi hei āwhina i ētahi kia mau ai i a rātou te reo," hei tā Elizabeth Hunkin.

Nā ngā kaiwhakawā i tuku te tāonga whakahirahira rawa atu o te pō ki Ngā Tāonga a Ngā Tama Toa Trust nō Tūranga, mō ā rātou mahi pupuru, whakamana hoki i ngā kōrerō tuku iho a te Rua Tekau Mā Waru, Kamupene C.

E ai ki te Ika-a-Whiro a Nolan Raihania, “Nei rā te hōnore nui ki te hunga nā rātou i whakamāori, nā rātou te mahi nui ki te whakamāori I te pukapuka a te  C Company.”

“Kei te kāinga tonu te nuinga o ngā pukapuka e kohikohi puehu tonu ana i tēnei wā, engari mā te pēnei pea tērā pea ka puta atu ki te ao,” hei tā Walton Walker, te Heamana Tuarua o Ngā Taonga a Ngā Tama Toa Trust.

Tekau mā whitu katoa ngā wāhanga tohu reo Māori e whakamana ana i te mahi whakarauora, whakapakari reo i roto i ngā hapori, te ao pāpāho, mātauranga, kāwanatanga hoki, ā, nā te Ratonga Ture o Wackrow Williams and Davies Limited te tohu Rāngai Tūmataiti i toa.

“Kei te tino hari, āhua whakamā engari koinei te tau hou uru atu tō mātou kamupene ki roto i tēnei whakataetae, tino pai, tino pai,” hei tā Te Kani Williams.

E wawata ana te rōia Māori a Alana Thomas, ka whakarei ngā tohu nei i te mahi nui kia whakawhanake ai te mana o te reo Māori ki roto i ngā kōti o Aotearoa.