Kaupapa: Education

He kaiako mātanga te hiahia ki Uawa

Aroha Treacher
  • Te Tai Rāwhiti

E oati ana ngā rōpu tōrangapū ki te whakatō i ngā miriona tāra ki te mātauranga, otirā ki ngā kura rua mano, e rima rau neke atu i Aotearoa. Kei tētahi o ngā taone iti i Te Tairāwhiti, ko Te Kura ā-rohe o Uawa me Kahukuranui. I haere atu ai tā mātou karere, a Aroha Treacher ki reira ki te kimi i ngā whakaaro i taua hapori.

"Kua roa mātou o tēnei takiwā o Te Tairāwhiti nei, kua roa mātou e whaiwhai atu ana i ngā kaiako e tika ana mō te pangarau me te pūtaiao. Koina pea tētahi o ngā hiahia nui, pātai nui ki te kāwanatanga kia aro nui mai ki ērā tūmomo kaiako," e mea ana te kaiarahi hapori o Uawa a Victor Walker.

E rua rau rima tekau ngā tauira kei Te Kura a Rohe o Uawa me Kahukuranui. Kei reira rātou e aki ai i ngā pūkenga e hangai ana ki tō rātou ahurea pērā i te mau rākau me te whakamahi i te whenua, ka mutu, ehara i te mea ko te rūma ako noa iho te aronga.

"Ko te whakapakari i te taha mātauranga ki ngā whānau o kōnei kia whai pūkenga ai rātou ki te tautoko i a rātou tamariki kia puta ai rātou ki ngā tini taumata me kī anō ko tētahi o ngā kōrero o kōnei: Kia titirangi te taumata heoi anō kia Uawa nui te whai," e kī ana te tumuaki tuarua a Earle Karini.

"Ehara i te mea he iwi whakawhirinaki mātou nei ki runga i ngā kāwantanga me kī, he iwi kaha tātou ki te whai i tā mātou e hiahia ai," e mea ana a Walker.