He kaiako kua hāmenetia mo te mahi taitōkai

Mere McLean
  • Waikato/Te Waiariki

He kaiako, he tumuaki tuarua o mua a Rueben James Tapara ki te kura Te Wharekura o te Kaokaoroa o Patetere i Pūtāruru.

Ki te kōti a rohe o Kirikiriroa i te ra nei, i hamenetia aia i runga i ngā whakapae e whitu. E toru mo te taitōkai, e toru ano mo te mahi pohane ki tētahi taitama kei ngā takiwa o te tekau ma rua ki te tekau ma ono ngā tau, a kotahi hoki mo te whāngai tarukino ki tētahi tamaiti i raro i ngā tau tekau ma waru.

E ai ki ngā korero i whakaako hoki a Tapara ki tetahi kura i te rohe o Te Kuiti i mua i tana haerenga ki Te Kaokaoroa i te tau 2010, heoi i te patanga o ngā whakapae, ka tere pana ia e te kura.

I kōrero tahi tā mātou karere ko Mere McLean ki a Keith Silveira, te tumuaki o te Wharekura o Te Kaokaoroa o Pātetere i te rā nei, engari kīhai ia i hiahia ki te kōrero ā-kamera mai. Hei tāna kei te taumaha ngā whānau o te kura i te wa nei, ā, ko tā ratou aronga nui i tēnei wā, he tautoko, he ārahi i ngā tauira.

No te patanga o te whakapae tuatahi, hei tā ngā pirihimana e toru ano ngā tono whakapae kua tau ki mua i to ratou aroaro. Ko te kī a Tapara i te ra nei kaore ia i hara, a kua whakahokia atu ia ki rō herehere tae noa ki te tuatoru o Tihema.