Kaupapa: ANZAC

He hui whakarākei rangatahi i tū ki Whangarei

Heeni Brown
  • Te Tai Tokerau

He huinga whakanui i te mahi a te rangatahi te whakahaere ki roto o Whangarei i te rangi nei, i te pinenga o ētahi pia hōu o te kāhui motuhake o Kamupene A ki te mētara.

E ai ki te Tumuaki o te Kura Hourua a Te Kāpehu Whetū, a Tākuta Nathan Mathews, he rite te āhuatanga nei ki tā ngā rangatū ope tauā ō-mua, inā ka tāpaetia ake ngā pia hei āpiha ki ngā whānau me te tohu ki te pine o te kāhui.

E haka ana mō rātou kua riro ki te pae o pakanga.  Mō rātou hoki i whawhai mō te Ope Māori.

E ai ki a Takuta Nathan Mathews, "Koira te kaupapa matua o te kura motuhake hei whakamaumahara atu ki rātou hōia kua haere ki ngā pakanga nui o te ao, hei aha, hei tauira pai mō ngā taitamatāne o ēnei rā."

Ko te huinga whakanui i ngā mahi o te tamatāne, i runga anō i te manako ka parahia e rātou te huarahi o te rangatiratanga.

Ki tā Takuta Nathan Mathews, “Ko te tikanga ka uru mai tētahi reanga hōu ki roto i te kura motuhake o A Company, nō reira kua ono tau tēnei kura motuhake e haere ana, engari koinei te reanga tuatahi ka uru mai i raro i te maru o Te Kāpehu Whetū." 

Kei te takiwā o te kotahi rau tekau tauira kei tēnei kura hourua, ā, koirā te hiahia a ētahi kia pērā anō ki o rātou tuākana a te wā. 

Hei tā Te Hurinui Retimana, "I kōrero au ki a Staff Luke i kī ai ia he pai tēnā, ka haere ahau ki roto i te Kamupene A a tērā tau."

Mō tōna wā tuatahi ko Te Ohomauri Henare tērā kua whai tūranga ki te kura-motuhake.

Ko ia kei te mau i ngā mētara o tōna tūpuna tuarua i a Tā Himi Henare, ā, he hōnore nui tēnei mō tana whānau. 

E ai ki a Waimahana Henare, "Tino hīkaka ana te ngākau kei uru taku tungāne ki roto i te kura motuhake o te Kamupene A, he uri whakaheke nō Tā Himi Henare."

Hei āpōpō mō te rangi o Anzac, ka huraina e Te Kāpehu Whetū tōna waka-tete hōu.

E ai ki a Tākuta Mathews ka noho hei mea rākau ako i te mātauranga Māori me te tikanga tātai whetū o te ao tawhito.