Kaupapa: Christmas

He hui whakanui i ngā uri o Ngāti Whātua o Orakei

  • Tāmaki Makaurau

Kua ūmere pai te takiwā o Takaparawha ki te katakata me te menemene ā āna uri whakatipu i te rangi nei.

Nō te tūnga mai o tētahi kaupapa motuhake i whakahaerehia e Ngāti Whātua o Ōrākei, ki te kawe i te wairua hākoakoa o te Kirihimete ki āna hunga taurikiriki.

Ā, hei tā tētahi o ngā kaiwhakarite o te hui nei, hei tā Graham Tipene, kua roa nei te whakapeto ngoi ana kia tū ai te kaupapa, i te mutunga ake, he reka ōna hua.

“I timata tēnei whakaritenga i tera tau. I tera tau i tu tenei ra i raro, ki Okahu. I tēnei ra kei konei ki te taha o te marae. Noreira i timata rātou, te ropu whakarite, i enei ahuatanga i tera tau. He roa te wa kia whakarite i tēnei rā.”

E ai ki a Tipene, he rā tēnei e tuuhono anō ai i ngā muka katoa o tēnei pā harakeke. Kia tū ai ngā tamariki anō nei te pou whakairo ka tū ki te Waitematā.

Ko te tumanako kia mohio ngā tamariki ko wai ta rātou whānau, he rā whakapiri, he rā whakakotahi ai ngā whānau katoa o Ōrakei nei, o Ngāti Whatua nei, ae koina tētahi tino wawata o te iwi.