Kaupapa: Christmas

He hui e whakamana ana i ngā uri o Te Whakatōhea

  • Waikato/Te Waiariki

Ko ngā ahikā o Te Whakatōhea tērā i muramura i te rangi nei i te whakakotahitanga atu o ngā uri ki te whakanui i tā rātou Whakatōheatanga. He tuatahinga tēnei hui, kua tapaina ki te ingoa Te Taunga Waka, hei whakamahara i te ūnga mai o ngā waka o Te Whakatōhea ki uta.

I ngā uri o Te Whakatōhea e whakarauika mai ana ki tana hui, i hoki mahara atu anō rā ki ōna waka tūpuna i tau mai ki tēnei pito whenua o Pākohae ki Otutaopuku i ngā tau o nehe.

Ko tā Te Riaki Amoamo, “Kātahi anō ka timata tēnei kaupapa e pā ana ki te taunga o ngā waka. Nā te taunga o ngā waka ka ū mai ngā tāngata e pā ana ki ngā uri o Muriwai, Tamatea Matangi.”

Ko te wawata o ngā kaumātua, mā te hui nei te iwi e whakapakari ake, aa, ko te whakaaro ka noho ko ngā kaupapa pēnei me te hakinakina hei ara tūhono i te hunga rangatahi ki ngā mahi a te iwi.   

E ai ki a Hohipera Williams, “Mā tēnei tū hui pea ka tino kaha rawa atu, ka tino kaha rātou ki te tautoko i Te Whakatōhea. Kei te āhua tautoko noaiho rātou ēngari karekau rātou, mātou katoa, i te tino mōhio ki ngā kaupapa.”

E ōrite ana ngā whakaaro o Te Riaki Amoamo, “Itiiti noaiho te wā ka kite au ki runga i o tātou Marae, tēnei wāhanga o rātou, nātemea ko te tumanako kia tae atu anō ki runga i o tātou Marae.”

Ko te mātanga haka o Te Whakatōhea, ko Te Kāhautu Maxwell tērā e whakatakoto wero ana i te papa tēnehi. “Kei te mōhio te hinengaro me pēhea ēngari ko ngā waewae he kōrero anō rā tērā.”

Tokomaha ngā pakeke i whakarārangi atu ki ngā papa whiu kōpere. Ka mutu, i te papa piriota whakatinanatia ai te ngako o te kaupapa.

E ai ki ngā whika o te wā a Tatauranga Aotearoa, kō tata atu i te tekau mā rua mano ngā uri o Te Whakatōhea, aa, tata ki te rima mano o rātou kei te rohe nei o Te Moana a Toi e noho ana.

Mō ētahi tungāne tokorua kei Ahitereiria e noho ana, he huihuinga tūhonohono taua kaupapa.

Kaati, hei te Raapa kapi ai te hui nei i tētahi konohete mō te tau hōu, ā, ko ngā manu tīoriori pēnei me Ardijah, Rob Ruha rātou ko Whirimako Black ka tū ki te whakangahau i te iwi.