He huarahi roa te whakatau i ngā nama nui o te kaporeihana Matauri X

Dean Nathan
  • Te Tai Tokerau

He moemoea noaiho nei ka ea te nama nui ki runga ngā whenua o te kaporeihana o Matauri X. Koinei te korero ā ngā tangata whai paanga mo te tono kei te aroaro o te kōti whenua Māori, kia tini i te tūnga o aua whenua e ngāwari ai te hokohokotanga. 

Ko te mate hei tā rātou ki raro i ngā whakahaere o taua kooti, kua piki rawa te nama ki ngā rangituhāhā.

He miriona taara te wariu o te tirohanga atu i te Marae o Ngāti Kura engari heoi ano te mea ka mahue ki te iwi inā riro te whenua.

Ko tā Dover Samuels, tētahi o ngā kaipupuri hea,”ko te mea kee ko te mana o te mōkete kei te pakanga ki te mana o te tangata whenua e whai pānga ana ki te whenua tuku iho.  Koia tēnā ko te tino ngau o te kaupapa e tarewa nei i mua I te aroaro o te kooti.” 

He tekau ma rua tau ki muri i te kuare te iwi whai paanga kua moketehia o ratou whenua e te kooti kia ea ai te utu i te nama rua ira kati rima miriona taara mo te rarunga o tētahi kamupene wai. 

I taua wa tonu ka whakaaetia e te iwi he riihi whenua me te tangata whai rawa o Kauri Cliffs kia ea ai taua mokete engari kihai rawa te kooti i whakaae.  Na mai i taua wa kua piki rawa atu taua nama ki te rua tekau ma rima miriona taara ki raro i te kaiwhakahaere na te kooti tonu i tohu ai.

Inaianei kua whakawāteahia te kaiwhakahaere i tōna tūrang, kua ritaia hoki te kaiwhakawā, mahue ana ko te kamupene whakaea nama kua tono ki te kooti kia tini i te tūnga o enei whaitua waru tekau neke atu e ngāwari ai te hokohokotanga i te mea e hia kee ngā tau inaianei horekau ano he whaitua kotahi kia hoko noa.

Ina kore e ea he ono rau heketea o nga whenua tupuna o Matauri ka riro.