Kaupapa: Environment

He huarahi pūngao hōu mō tētahi hapū o Te Tai Rāwhiti

Mere McLean
  • Te Tai Rāwhiti

Kua tahuri ngā whakaaro o Te Whānau-a-Apanui ki Ōmaio ki te mahi hiko, mā te whakamahi i ngā hīhī o Tamanuiterā, i ngā au o Te Moana a Toi me te rere o ngā awa kei tō rātou takiwā.

He kaupapa tēnei kua roa e haere ana i runga i ngā whakaaro mā te mōhio, ka mārama, ka mātau, ā, mā te mātau, ka ora.

I te marama o Haratua nā te hapori o Omaio i manaaki i tētahi ope tauira whare wānanga i tae mai ki te rangahau i ngā huarahi pūngao hōu, ka titiro iho ki ngā mihini hopu hau i ngā pae maunga o Ōmaio me ngā rawa o te rere wai.

I tipu mai te whakaaro nei i te nui o te utu mō te hiko, ka tahuri te whānau ki te rapu oranga pēnei, hei painga mā te hapori whānui.

I whakatūhia te kahui nei ki raro i ngā marae e toru o Ōmaio ko tā rātou hiahia he whakatū umanga pūngao hōu mā te whakatinana i ngā huarahi i kite ake ki roto i ngā rangahau.

Mā roto i ngā rangahau, ko te hiahia a tēnei kāhui kia rata mai te hunga tautoko engari he kaupapa tēnei ka noho motuhake ki raro i a rātou.