Kaupapa: Iwi Settlements

He hokinga mahara mo Waikato-Tainui ki ngā tau rua tekau kua pahure

Wepiha Te Kanawa
  • Waikato/Te Waiariki

He rangi nui whakaharahara tēnei mō Waikato Tainui, he titiro whakamuri ki ngā kaupapa i ea i roto i ngā rua tekau tau ki muri.

Ko tētahi o aua kaupapa ko te hainatanga o tā rātou kereme me te pirimia o taua wā a Jim Bolger, ā, ko te Arikinui Te Atairangikaahu tērā i tautoko. I Hopuhopu tā mātou karere a Wepiha Te Kanawa i tēnei ata.

Hei tā Koro Wetere, “E kore rawa e warewaretia e te iwi ki te kaupapa nei, i murua rā ngā whenua, ā, i te mutunga ka tutuki i runga i tērā kaupapa i riro whenua atu, i hoki whenua mai. Ana, ko tātou i tēnei rā ngā i whiwhi nei i ngā taonga o rātou mā.”

Neke atu i te 1.2 miriona eka te nui o te whenua i riro atu, heoi he maramara whenua noiho i whakahokia mai. Koinei te rūma ki Hopuhopu i hainatia ai te whakataunga kerēme o Waikato.

I whakamanahia te ture o ngā kerēme raupatu o Waikato i te tau tahi mano iwa rau iwa tekau mā rima, te ture whakataunga kereme anake kua waitohungia e Kuini Irihapeti te tuarua.

Hei tā Rahui Papa, “He rangi e mahara ai ki ngā hara a te Karauna, he rangi e mahara ai ki te whakaeatanga o te hara te Karauna. I whakaaetia e te Arikinui Te Atairangikaahu te whakapāhā a te Karauna, nā reira he rangi nui whakahirahira tēnei.”

Koinei noiho te timatanga o ngā kaupapa whakanui mō te iwi, ka hāere tonu ake tae noa ki te tau hou.