Kaupapa: Kapa Haka

He hoa ngahuru, kei kapa raumati ki te rohe o Rangitāne

Leah Te Whata
  • Te Tai Hauāuru
  • Te Tai Rāwhiti

Ko te rōpu haka toa nō Rangitāne kei te whakatakoto i te manuka i tāna whakamarara i te kapa, ā kia whānui noa atu te toro o ōna parirau ki ngā rōpu hōu e toru. Ko te whāinga ia, ko te whakarahi ake i ētahi atu kai-haka ki Te Matatini.

E ai ki te pouako haka, ki a Kelsi Te Peeti, "Kua piki ake te taumata mō te wāhanga whakataetae ki roto i tēnei rohe."

Nō te tau rua mano tekau mā whā te tū a Kairanga hei toa whakaihuwaka. I tēnei tau, ka tū a Huia Ahorau, Te Tini o Rehua me Te Reureu ki te whakataetae. Ko ngā kaiwhakaako, he kaihaka o mua o Kairanga.

Ko tā Te Peeti, "I rata mātou katoa ki te whakaaro me tū he kapa mō o tātou rohe e noho ana tātou i roto i te Papaioea."

I whakatūria te rōpu Huia Ahorau ki tētahi hapori pōkaikaha hei whakakotahi i ngā whānau Māori.

E ai ki a Lewis Karaitiana, he pouako haka hoki ia, "He maha rawa te hunga rawa kore e noho ana i konei, waihoki ko te nuinga he uri Māori. I mōhio pai mātou he rautaki tēnei kia whakakotahi te hapori Māori kia aro atu rātou ki tētahi kaupapa Māori."

E ono ngā rōpu ka tū ki te papa whakatū waewae ki Te Papaioea hei ngā rangi okioki e tū mai nei. E rua ka eke ki Te Matatini. Ko te manako a ngā rōpu hou, kia whai wāhi kē ngā kapa e toru ki te whakataetae ā-motu.

Ko tā Karaitiana, "Ko te tino hiahia kia whanake te taumata o te kapa, heoi ko tētahi atu tino hiahia kia hoki mai ngā uri o Rangitāne ki te kainga kia whakarangatira i tēnei kaupapa o Tangata Rau."

Ki te toa rātou, ki te kore rānei, ko te tino hua ko te whakawhanaketanga o te haka me te ahurea Māori ki ngā rohe o Manawatū, Wairarapa me Horowhenua.