Ngā kaupapa: Iwi Settlements, Treaty Settlements

He hikoitanga hōu mo Ngāti Rangi

Mere McLean
  • Waikato/Te Waiariki

I tū te hainatanga mo te whakataunga kereme ki waenga i a Ngāti Rangi me Te Karauna ki runga o Raketepauma Marae, Waiouru i tēnei rā. He mahi e tohu ana i te otihanga o ngā mahi o ngā tau maha mo te iwi hei tohu hoki i te hainatanga tuatahi o te Minita whakataunga take tiriti hōu a Andrew Little.

Hei tā Che Wilson te māngai korero mo Ngāti Rangi ki te taha o te karauna, “ahakoa ngā mahi nukurau, engari ka rongo i tana kupu whakapāaha kia ea ai te mama, ā, ka timata anō, te ara hōu.” Nō te tau tekau mā rima i timata a Ngāti Rangi te whakawhiti korero me te karauna.

I tēnei rā tekau mā whitu miriona ngā pūtea me ngā rawa ka whakahoki ki a rātou, ka uru mai hoki ko ngā whenua nō rātou tatu noa ki ngā kupu aroha a te karauna. Ki tā te Minita Take Tiriti, “he huinga miharo, ā wairua tēnei na te mea ka tīkina atu i ngā āhuatanga kotahi rau whitu tekau mā waru ki muri, ko ngā mamae i rongohia, ā, kei konei ahau mo te karauna kua tae mai ki te whakatika i hē kia pai ai te hikoi whakamua, koinei ta Te Tiriti i whakatauirahia.”

Ko ngā korero e hāngai ana ki a Tongariro kihai i uru ki roto i tēnei whakataunga kereme, ka puta anō ērā korero ki waenga i te karauna, Ngāti Rangi ētahi atu iwi, hapū ki roto i tētahi atu kereme. Mo Raana Mareikura, morehu kuia nō Ngāti Rangi, “ka hoki ngā whakaaro ki a rātou, na rātou i timata tēnei mahi, kua tae mai ki tēnei wā kua pupu ake ngā roimata o te kainga.” Ka haere tonu ngā whakanuitanga mo Ngāti Rangi i te wā ka whakahaerehia e rātou ngā whakanuitanga mo Ruapehu Whānau ki Te Pae Tata, Ohakune āpōpō.