He hangarau VR mā ngā mauhere ki te ako

Aroha Treacher
  • Te Tai Rāwhiti

Ko te whai a Ian Taylor o Animation Research Ltd, he kamupene e hanga pikitia-a-tihi, kia whakarewa hangarau hōu ara ko te virtual reality ki rō whare herehere puta noa i te motu kia tāea ai ngā mauhere te mahi pangarau me te pānui hoki.

I whakarewaina tēnei kaupapa i te whare herehere o Otakou i reira puta ai ngā painga mā ngā mauhere, e hiahia ana rātou ki te ako, ka poupoua hoki ai te mātauranga ki a rātou.

"Haramai tēnei mea te VR hei awhinatia hei whakaako i ngā mauhere kia awhinatia rātou kia whai pukenga kia whai mātauranga i a rātou kei roto i te whare herehere  kia āwhinatia hoki rātou i te putanga mai ki waho ki te hapori," tā Kelvin Davis, Minita Te Ara Poutama.

Ko tā Taylor mā te kaupapa pāhekoheko nei ka māmā noa iho mā ngā mauhere te ako pangarau, pānui anō hoki.

"He tino painga tēnei hangarau ki a rātou kei te mahi tahi mātou me te Methodist Mission, kei te whakahaerehia e rātou kaupapa ki rō whare herehere, ko te whai o tēnei hangarau kia hāpai ake ngā mauhere, nā reira hei ngā marama e ono, tekau mā rua rānei ka kite mātou i ngā hua," tā Taylor.
 

Kei te mahi tonu rātou ki te whānui ake i te kaupapa nei, ko te whainga nui, kia noho pai te hapori whānui, kaua ko te whai pūtea.