Kaupapa: Education

He aukati i te tautoko ki ngā kura hourua te tono ki ngā mema PPTA o te raki

Dean Nathan
  • Te Tai Tokerau

Me aukati te tautoko ki ngā kura hourua, koinei te tono a te Uniana Kaiako a Te Wehengarua ki ngā kura tuarua o Te Tai Tokerau.

Nā, e ai ki ngā kaiārahi o ngā kura hourua Māori ki Whangarei me Whangaruru, he mahi whakaweti kē i a rātou e aro ana ki te whakatūwhera i o rātou kuaha hei te tau hōu.

Kei runga ake i ngā kōrero a te rōpū tautoko i te Kura Hourua ki Whangaruru ko te aukati atu a te rōpū PPTA i ngā kura hourua.

Hei tā te Kaihautū Marautanga o Te Kura o Whangaruru, tā Natasha Sadler, e aroha atu ana ia ki ngā tamariki i te mea, te āhua nei ka kore rawa rātou e tautoko i ngā tamariki Māori i roto i ngā kura hourua e rua nei.

E mārama ana a Te Kāea he nui kē te tautoko a ngā mema PPTA o tēnei rohe ki tā ngā kura hourua e whai nei.

Heoi anō, hei te wiki e tū mai nei huitahi ai ngā rangatira o te PPTA me āna mema ki Whangarei.

E whakapono ana te Perehitini o NZPPTA, a Angela Roberts, ko te whakatikatika i te pūnaha tūmatawhānui kē te wero nui.

I raro i te pūnaha o te wā kua pau kē te rautau kei te kino tonu ngā tatauranga mātauranga Māori ki tēnei rohe.

Koia kua titiro ngā kura hourua Māori nei ki waho atu o te pouaka ki te rapu oranga e piki ake ai ngā tauira Māori ki ngā taumata. 

Kahore hoki te PPTA i te tautohe ki tērā.

Ko tā Natasha Sadler, ka haere tonu a rātou mahi ki ngā kura hourua nei hei painga mā ōna ākonga Māori.

Ahakoa ngā piki me ngā heke, hei te tau hōu tūwhera ai ngā tatau ki ngā kura hourua nei.